اسلام آباد ۔وفاقی وزارت قانون و انصاف نے صدر مملکت آصف علی زرداری کی جانب سے سپریم کورٹ میں چھ مستقل اور ایک قائم مقام جج کے تقرر کی منظوری کے بعد باضابطہ نوٹیفکیشن جاری کر دیا، ساتھ ہی متعلقہ ہائی کورٹس میں قائم مقام چیف جسٹسز کی تقرری بھی عمل میں لائی گئی۔
سپریم کورٹ میں تقرر کردہ سات نئے جج آج صبح 9 بجے چیف جسٹس پاکستان یحییٰ آفریدی سے حلف اٹھائیں گے۔
نوٹیفکیشن جاری کیے جانے سے قبل، صدر مملکت نے بلوچستان ہائی کورٹ کے چیف جسٹس ہاشم کاکڑ، سندھ ہائی کورٹ کے چیف جسٹس محمد شفیع صدیقی، جسٹس صلاح الدین پہنور، پشاور ہائی کورٹ کے جسٹس شکیل احمد، اسلام آباد ہائی کورٹ کے چیف جسٹس عامر فاروق اور پشاور ہائی کورٹ کے چیف جسٹس اشتیاق ابراہیم کی سپریم کورٹ میں تقرری کی منظوری دی تھی۔
صدر مملکت کی منظوری کے بعد وزارت قانون و انصاف نے سپریم کورٹ میں سات ججوں کی تعیناتی کا نوٹیفکیشن جاری کر دیا، جس میں اسلام آباد ہائی کورٹ کے جسٹس میاں گل حسن اورنگزیب کو قائم مقام جج مقرر کیا گیا ہے۔
علاوہ ازیں، وزارت قانون نے جسٹس عتیق شاہ کو پشاور ہائی کورٹ، جسٹس جنید غفار کو سندھ ہائی کورٹ اور جسٹس سرفراز ڈوگر کو اسلام آباد ہائی کورٹ میں قائم مقام چیف جسٹس کے طور پر تعینات کرنے کا نوٹیفکیشن جاری کر دیا ہے۔
اسی طرح، جسٹس اعجاز سواتی کی بطور قائم مقام چیف جسٹس بلوچستان ہائی کورٹ تقرری کا بھی باضابطہ اعلان کر دیا گیا ہے۔ چاروں ہائی کورٹس کے قائم مقام چیف جسٹس صاحبان، مستقل تقرری تک اپنی ذمہ داریاں انجام دیں گے۔
