اسلام آباد (سٹاف رپورٹر)وفاقی وزیر برائے بحری امور محمد جنید انور چوہدری نے کولمبو، سری لنکا میں میڈیا بریفنگ کے دوران موسمیاتی بحرانوں سے نمٹنے کے لیے علاقائی تعاون کی ضرورت پر زور دیا۔ وزیر جنید چوہدری دو روزہ دورے پر سری لنکا میں موجود ہیں تاکہ سائیکلون ڈیٹواہ کے بعد پاکستان کی یکجہتی کا پیغام پہنچایا جا سکے اور سری لنکا کی بحالی میں تعاون کا یقین دلایا جا سکے وزیر نے وزیراعظم محمد شہباز شریف، حکومت اور پاکستانی عوام کی جانب سے متاثرہ خاندانوں کے لیے تعزیت اور ہمدردی کا اظہار کیا اور سری لنکا کی حکومت اور متاثرہ کمیونٹیز کی فوری کارروائی اور بہادری کی تعریف کی جنید چوہدری نے کہا کہ پاکستان ہر ممکن انسانی اور تکنیکی امداد فراہم کرنے کے لیے تیار ہے۔ “اس وقت پاکستانی ٹیمیں اور ریسکیو عملہ سری لنکا میں موجود ہیں، جو زندگیاں بچانے اور ریلیف آپریشنز میں مدد فراہم کر رہے ہیں۔”
وزیر نے بتایا کہ وزیراعظم کی ہدایات کے تحت ایک بڑا انسانی ہمدردی پیکج سری لنکا بھیجا جا چکا ہے۔ انہوں نے مزید کہا کہ پاکستان کے ہائی کمشنر کولمبو، میجر جنرل فہیم ال عزیز، اور نیشنل ڈیزاسٹر مینجمنٹ اتھارٹی، سری لنکا کے حکام کے ساتھ قریبی رابطے میں ہیں تاکہ ریلیف سپلائی بروقت اور مؤثر طریقے سے تقسیم کی جا سکے جنید چوہدری نے پاکستان اور سری لنکا کے درمیان تاریخی دوستانہ تعلقات اور بحری تعلقات کو اجاگر کرتے ہوئے آفات کے انتظام، بحری تحفظ اور ابتدائی انتباہی نظام میں تعاون کو مزید بڑھانے کی خواہش ظاہر کی وزیر نے کہا، “پاکستان آج اور ہمیشہ سری لنکا کا قابل اعتماد دوست اور شراکت دار ہے” اور سری لنکن عوام کی مضبوطی اور بحالی کے لیے دعائیں بھی کیں۔ انہوں نے میڈیا نمائندگان کو پاکستان اور وزارت بحری امور کے دورے کی دعوت بھی دی تاکہ عوامی تعلقات کو فروغ دیا جا سکے اور دوطرفہ روابط مضبوط ہوں۔
