لاہور(سٹاف رپورٹر) وزیراعلیٰ مریم نواز نےستھرا پنجاب کے ڈیڑھ لاکھ ورکرز کیلئے راشن کارڈ لانچ کرنے کا اعلان کردیا ، وزیراعلیٰ پنجاب مریم نوازنے ستھرا پنجاب کے ورکرز کو شاباش دی ۔تقریب سے خطاب کرتے ہوئے کہا کہ ستھرا پنجاب کی ٹیم کی وردی پہن کر فخر محسوس ہورہا ہے۔ ستھرا پنجاب کے تمام ہیروز کو سلام پیش کرتی ہوں۔اگر بطور وزیر اعلیٰ میں کمانڈوز کی وردی پہن سکتی ہوں تو ستھرا پنجاب ٹیم کی وردی کیوں نہیں پہن سکتی۔ پولیس، کمشنرز، ڈپٹی کمشنرز سب انتظامیہ میری فورس کا حصہ ہے اسی طرح ستھرا پنجاب بھی میری ٹیم کا حصہ ہے ، انہوں نے کہا کہ ستھرا پنجاب کی ٹیم نے شہر، دیہات،گلی محلوں، سڑکوں کو صاف کیا ان کی شکر گزار ہوں۔ ستھرا پنجاب کی ٹیم نے پنجاب کے شہر،گلی محلے اورکونے کونے کو صاف کر دیا ہے۔ سیلاب کے دوران سول ڈیفنس، ریسکیو، پولیس، کمشنرز، ڈپٹی کمشنر،کابینہ اورستھرا پنجاب کی ٹیموں نے بھر پور کام کیا۔ سیلاب کے دوران ستھرا پنجاب کی ٹیم نے انسانی زنجیر بنا کر سیلابی ریلے کو روک رہے تھے۔
مریم نواز نے کہا کہ ریسکیو کا کام ستھرا پنجاب کی ٹیم کا نہیں تھا لیکن انسانی ہمدردی کے پیش نظر دن رات کام کیا۔ ستھرا پنجاب کے ورکرزکو تصویر پرلگے کیچڑ کو صاف کرتے دیکھ کر خوشی ہوئی۔ ساہیوال میں ستھرا پنجاب کے ورکرز گلی محلوں میں اعلان کرکے کوڑا کڑکٹ اکٹھے کرتے ہیں۔میں لوگوں کے خواب پورا کرنے کی کوشش کرتی ہوں، ستھراپنجاب کی ٹیم نے میرے خواب پورے کیے۔ ستھرا پنجاب کی ڈیڑھ لاکھ فورس پر مشتمل ٹیم دنیا کی سب سے بڑی ٹیم ہے ، وزیراعلیٰ مریم نواز نے وزیر بلدیات ذیشان رفیق اور سیکرٹری لوکل گورنمنٹ کوشاباش دی ۔ وزیر اعلیٰ مریم نواز نے کہا کہ شہباز شریف کی حکومت ختم ہوتے ہی صفائی کا نظام بھی ختم ہوگیا۔ گوگی پنکی کے دور میں پاکستان کے ہر شہر، گلی محلے اور سڑکوں پر گندگی کے ڈھیر پڑے تھے۔ سیلاب متاثرہ علاقوں میں امدادی سرگرمیاں قابل تعریف ہیں ، انہوں نے متاثرہ علاقوں میں امدادی سرگرمیوں پر رضاکاروں کو خراج تحسین پیش کرتے ہوئے کہا کہ گزشتہ دور میں چند افراد کی صفائی ستھرائی پر مشتمل ٹیم تھی۔لاہور، راولپنڈی، ملتان اور بہاولپور جیسے بڑے شہروں کے علاوہ پورے صوبے میں صفائی کا کوئی بندوبست نہیں تھا۔ موجودہ حکومت نے ڈیڑھ لاکھ پر مشتمل ستھرا پنجاب ٹیم تشکیل دی ، مریم نواز نے کہا کہ لوگ اب کوڑے والا نہیں کہتے بلکہ صفائی والے ورکرز کہہ کر پکارتے ہیں۔ ہر ضلع میں صفائی ستھرائی کے لئے مشینیں بھجوارہے ہیں۔ ایک سال کے اندر تمام اضلاع میں سٹیٹ آف دی آرٹ ستھرا پنجاب کا پورا سسٹم نفاذ ہے۔ پورے پنجاب میں 35ہزارمشینری آئٹمزاورلاکھوں کی تعداد میں کنٹرینرز موجود ہیں۔گزشتہ دور میں عیدالاضحی پر کئی کئی ہفتے آلائشیں گلی محلوں میں پڑی رہتی تھیں۔ آج عیدالاضحی پر صرف دو گھنٹوں میں ہی آلائشوں کو ٹھکانے لگا دیا گیا۔
انہوں نے کہا کہ آج عوام کے پاس وزیراعلیٰ، منسٹر اور ادارہے کے اہلکار جاتے ہیں۔ہر ضلع کے پاس اس کی اپنی مشینری موجود دوسرے اضلاع سے مانگنے کی ضرورت نہیں۔ شہروں میں پھر بھی صفائی ہوتی لیکن دیہات میں اس کا تصور ہی نہیں تھا۔ بیٹیاں اپنے گھروں کو صاف ستھرا رکھتی ہیں،آج پنجاب کا کونہ کونہ چمک دمک رہا ہے ، مریم نواز نے کہا کہ شہبازشریف کہتے تھے کہ مریم نواز اتنے بڑے صوبے کو کیسے سنبھالے گی۔ آج شہبازشریف مجھے ملتے ہیں تو کارکردگی دیکھ کر شاباش دیتے ہیں۔ تعلیم، صحت، صفائی، سڑکوں کی بحالی، سواری عوام کا بنیادی حق ہیں۔ عوام کے حق کو صدقے دل اور پوری ایمانداری سے کام کررہی ہوں۔ پنجاب کے طلبہ کو ہونہار سکالر شپ اور لیپ ٹاپ دے رہیں تاکہ ان کی تعلیم میں حرج نہ آسکے ، ان کا کہنا تھا کہ پورے پنجاب میں کرائم کی شرح صفر ہوگئی ہے۔ گزشتہ دور حکومت میں ڈاکے اور خواتین کو ہراساں کیا جارہا تھا۔ خواتین کو ہراساں کرنے والوں کو آج 24 گھنٹے کے اندر اندرگرفتار کر لیا جاتا ہے۔ مریم نواز ان دماغوں کی بھی صفائی کررہی ہے جو پنجاب کی ترقی سے جلتے ہیں۔ اگر میں پنجاب کے عوام کی بات نہیں کروں گی تو کون کرے گا۔ ترقی اور صفائی کا ایک انقلاب برپا ہوگیا ہے ،وزیر اعلی ٰ مریم نواز نے کہا کہ سندھ، بلوچستان اور خیبرپختونخوا کو صاف ستھرا اور ترقی یافتہ دیکھنا چاہتی ہے۔اگر سڑکیں خراب،بسیں ٹوٹی پھوٹی، آٹا مہنگا اور گلی محلے گندے ہیں تو اپنی حکومتوں سے سوال کریں۔ طلبہ کو لیپ ٹاپ نہیں ملتے، روزگار نہیں مل رہا تو اپنی حکومت سے سوال کریں۔ ترقی، صفائی ستھرائی، لیپ ٹاپ اورروزگار عوام کا حق ہے۔
