علی امین گنڈا پور نے دوسری بار جلسہ ناکام بنا دیا،عطا تارڑ

اسلام آباد۔وفاقی وزیر اطلاعات عطا اللہ تارڑ کا کہنا ہے کہ پی ٹی آئی کا لاہور جلسہ بھی ناکام رہا۔عطا اللہ تارڑ، جو کہ پاکستان مسلم لیگ (ن) کے رہنما بھی ہیں، نے پی ٹی آئی کے لاہور جلسے کے بعد کہا کہ یہ جلسہ اسلام آباد کی طرح ہی فلاپ ثابت ہوا ہے۔انہوں نے بیان دیا کہ آج لاہور کی تمام سڑکیں کھلی رہیں، اور پی ٹی آئی کے لیے کوئی رکاوٹ نہیں کھڑی کی گئی، مگر پھر بھی وہ چند لوگوں کو اکھٹا کرنے میں ناکام رہے۔عطا تارڑ نے مزید کہا کہ عوام نے پی ٹی آئی کے جلسے کو مسترد کر دیا ہے اور یہ عوام کو جمع کرنے میں مکمل طور پر ناکام رہے ہیں۔وزیر اطلاعات نے کہا کہ پی ٹی آئی نے جلسے کے حوالے سے بڑے بڑے دعوے کیے تھے، مگر ان کے تمام دعوے بے بنیاد ثابت ہوئے۔ انہوں نے عدلیہ اور اداروں کے خلاف محاذ آرائی بھی شروع کر رکھی ہے۔عطا تارڑ نے علی امین گنڈا پور پر تنقید کرتے ہوئے کہا کہ انہوں نے دوسری بار جلسہ ناکام کیا ہے اور انہیں مریم نواز سے اپنا موازنہ نہیں کرنا چاہیے۔ ان کی سیاست، جلسی، اور گورننس سب ناکام ہو چکی ہیں۔