راولپنڈی ۔ 150ویں GD(P)، 96ویں انجینئرنگ، 106ویں ایئر ڈیفنس، 26ویں A&SD، 9ویں لاجسٹک اور 132ویں کمبیٹ سپورٹ کورسز کی گریجویشن تقریب آج پی اے ایف اکیڈمی اصغر خان، رسالپور میں منعقد ہوئی۔ چیئرمین جوائنٹ چیفس آف سٹاف کمیٹی جنرل ساحر شمشاد مرزا تقریب کے مہمان خصوصی تھے۔ پاک فضائیہ کے سربراہ ائیر چیف مارشل ظہیر احمد بابر سدھو بھی موجود تھے۔ تقریب کے دوران مجموعی طور پر 139 ایوی ایشن کیڈٹس، 08 جنٹلمین کیڈٹس اور 02 نیول کیڈٹس نے گریجویشن کیا۔
جنرل سروس ٹریننگ میں مجموعی طور پر بہترین کارکردگی پر چیئرمین جوائنٹ چیفس آف سٹاف کمیٹی کی ٹرافی ایوی ایشن کیڈٹ اسپورٹس سارجنٹ عمران رضا کو دی گئی جبکہ کمبیٹ سپورٹ کورس میں مجموعی طور پر بہترین کارکردگی کی ٹرافی ایوی ایشن کیڈٹ عثمان رشید نے حاصل کی۔ ایئر ڈیفنس کورس میں بہترین کارکردگی پر چیف آف دی ایئر سٹاف ٹرافی ایوی ایشن کیڈٹ سارجنٹ حسیب عبدالمالک نے وصول کی۔ پاکستان نیول کیڈٹ سارجنٹ حافظ علی اسد کو کالج آف ایروناٹیکل انجینئرنگ میں مجموعی طور پر بہترین کارکردگی پر اعزازی تلوار سے نوازا گیا۔
کالج آف فلائنگ ٹریننگ میں مجموعی طور پر بہترین کارکردگی پر اعزاز کی تلوار ایوی ایشن کیڈٹ، اکیڈمی انڈر آفیسر عبداللہ سعد علی نے وصول کی۔ گریجویٹ ہونے والے کیڈٹس سے خطاب کرتے ہوئے مہمان خصوصی نے گریجویٹ ہونے والے کیڈٹس اور ان کے اہل خانہ کو مبارکباد دی۔
تقریب کے بعد پی اے ایف اکیڈمی ایروبیٹکس ٹیم “شیرڈیلز” کی طرف سے ایک سنسنی خیز فضائی نمائش ہوئی۔ اس کے بعد PAF میراج، F-16، JF-17 اور J-10C لڑاکا طیاروں کے فارمیشن فلائنگ ڈسپلے نے PAF کی پیشہ ورانہ صلاحیتوں کا مظاہرہ کرتے ہوئے حاضرین کو محظوظ کیا۔ گریجویشن پریڈ کا مشاہدہ اعلیٰ فوجی اور سول معززین کے ساتھ ساتھ گریجویشن کرنے والے کیڈٹس کے والدین نے کیا۔
