کراچی۔فیڈرل بورڈ آف ریونیو (ایف بی آر) نے محمد بن قاسم پورٹ کی فیکٹریوں سے اربوں روپے ٹیکس وصول کیا، اور 2024 میں ٹیکس وصولیوں میں طویل عرصے بعد نمایاں بہتری دیکھی گئی۔
ایف بی آر کے جاری کردہ اعداد و شمار کے مطابق، جنوری 2024 میں سات سال بعد کراچی ایکسپورٹ پراسیسنگ زون میں ٹیکس وصولیاں نمایاں رہیں۔ محمد بن قاسم پورٹ کی فیکٹریوں کے ٹیکس تنازعات کو حل کرتے ہوئے ایف بی آر نے 306 فیصد اضافہ کے ساتھ ٹیکس جمع کیا۔
ایف بی آر کے بیان کے مطابق، وی جی ٹیکسٹائل سے 2 کروڑ 87 لاکھ روپے، ایم وائی ٹیکسٹائل سے 83 لاکھ روپے، لاجسٹک سروسز سے 56 لاکھ روپے، ردہ کلودنگ سے 40 لاکھ روپے وصول کیے گئے، جبکہ 31.2 میٹرک ٹن کپڑوں کی بازیافت بھی کی گئی۔
مزید بتایا گیا کہ سلور ڈینم سے 37 لاکھ روپے ٹیکس وصول کیا گیا، اور مجموعی طور پر جولائی سے دسمبر 2024 تک 2 ارب 66 کروڑ 90 لاکھ روپے کی ٹیکس وصولیاں کی گئیں۔
بیان میں یہ بھی کہا گیا کہ ایف بی آر اور فیکٹریوں کے مابین ٹیکس تنازعات کو سی آئی ڈی آر سسٹم کے ذریعے حل کیا گیا، جس سے وصولیوں میں یہ اضافہ ممکن ہوا۔