اسلام آباد(سپیشل رپورٹر)آئل اینڈ گیس ڈیولپمنٹ کمپنی لمیٹڈ (او جی ڈی سی ایل) کے چیئرمین، ظفر مسعودکا کمپنی کے ہیڈ آفس اسلام آباد کا دورہ کیا۔ چیئرمین او جی ڈی سی ایل نے منیجنگ ڈائریکٹر/سی ای او احمد حیات لک اور او جی ڈی سی ایل کی ٹیم سے ملاقات کی اور پاکستان منرلز انویسٹمنٹ فورم 2025 (پی ایم آئی ایف 25) کے کامیاب انعقاد پر مبارکباد دی۔ اس موقع پر چیئرمین ظفر مسعود نے عالمی معیار کے اس ایونٹ کے انعقاد پر او جی ڈی سی ایل ٹیم کی کاوشوں کو سراہا، جس نے پاکستان کے معدنی وسائل کو دنیا کے سامنے کامیابی سے پیش کیا۔ انہوں نے کہا کہ پی ایم آئی ایف 25 نے پاکستان کو معدنیات اور قدرتی وسائل کے ابھرتے ہوئے عالمی مرکز کے طور پر مضبوطی سے متعارف کروایا ہے۔
پی ایم آئی ایف 25 کی کامیابی کو سراہتے ہوئے، چیئرمین نے پاکستان منرلز انویسٹمنٹ فورم 2026 (پی ایم آئی ایف 26) کی تیاریوں پر تبادلہ خیال کیا۔ انہوں نے زور دیا کہ پی ایم آئی ایف 25 سے حاصل ہونے والی کامیابی کو مدنظر رکھتے ہوئے اگلے فورم کو مزید مؤثر اور جامع بنایا جائے۔ انہوں نے جلد از جلد منصوبہ بندی، بین الاقوامی سطح پر رابطوں اور جدید حکمت عملی اپنانے کی ضرورت پر زور دیا تاکہ پی ایم آئی ایف 26 کومزید کامیاب بنایا جا سکے۔ چیئرمین نے آئندہ سال کے فورم کے ابتدائی منصوبوں کا جائزہ لیتے ہوئے کہا کہ پی ایم آئی ایف 26 کا دائرہ کار اور اس کا انعقاد پہلے سے بھی زیادہ پرعزم ہونا چاہیے۔ انہوں نے پی ایم آئی ایف 26 کی ممکنہ تاریخ اور مقام سے متعلق تجاویز پر بھی گفتگو کی۔
پی ایم آئی ایف 25، جو کہ او جی ڈی سی ایل نے اسپیشل انویسٹمنٹ فیسلیٹیشن کونسل (SIFC) اور حکومتِ پاکستان کے تعاون سے منعقد کیا، پاکستان کے وسیع معدنی وسائل کو اجاگر کرنے کی جانب ایک اہم قدم تھا۔ اس فورم میں 5,000 سے زائد شرکاء نے شرکت کی، جبکہ 300 سے زائد بین الاقوامی و قومی مندوبین، حکومتی عہدیداران، ماہرینِ معدنیات، سرمایہ کار، اور ماہرین تعلیم شامل تھے، نے بھی پی ایم آئی ایف 25 میں حصہ لیا۔
