اسلام آباد (نیوز رپورٹر)ڈپٹی وزیراعظم اور وزیر خارجہ سینیٹر محمد اسحاق ڈار نے جمعے کے روز صارفین کو معیاری اور متفقہ قیمتوں پر غذائی اجناس کی فراہمی کو یقینی بنانے کی اہمیت پر زور دیا ، ڈی پی ایم کے دفتر سے جاری ہونے والے ایک بیان کے مطابق، انہوں نے ضروری غذائی اشیاء کی فراہمی اور دستیابی کا جائزہ لینے کے لیے ایک اعلی سطحی اجلاس کی صدارت کی۔ اجلاس کے دوران، ڈپٹی وزیراعظم نے اسٹیک ہولڈرز کو ہدایت کی کہ وہ متفقہ قیمتوں پر اشیاء کی فراہمی کو یقینی بنائیں۔
اجلاس میں وزیر برائے قومی غذائی تحفظ، خصوصی معاون وزیراعظم طارق باجوہ، خوراک اور پیداوار کے سیکرٹریز، ایف بی آر کے چیئرمین، ایف آئی اے کے ڈائریکٹر جنرل اور پاکستان شوگر ملز ایسوسی ایشن (PSMA) کے نمائندوں نے شرکت کی ، ڈپٹی وزیراعظم نے کہا کہ عوام کو معیاری اور سستی خوراک کی فراہمی حکومت کی اولین ترجیح ہے۔ انہوں نے متعلقہ اداروں کو ہدایت کی کہ وہ بازاروں میں اشیاء کی قیمتوں اور معیار پر سختی سے نظر رکھیں تاکہ کسی بھی قسم کی زیادتی کو روکا جا سکے۔
حکومت کی جانب سے غذائی اجناس کی قیمتوں کو کنٹرول کرنے اور ذخیرہ اندوزی کے خلاف کارروائی کو تیز کرنے کے اقدامات جاری ہیں۔ اس سلسلے میں ایف آئی اے اور دیگر اداروں کو مزید فعال کردار ادا کرنے کی ہدایت کی گئی ہے ، اجلاس میں یہ بھی طے پایا کہ تمام صوبائی حکومتوں کے ساتھ مل کر خوراک کی دستیابی اور قیمتوں کے توازن کو یقینی بنایا جائے گا۔
