اسلام آباد (نیوز رپورٹر)وفاقی وزیر پٹرولیم علی پرویز ملک نے پاکستان کے اعزازی قونصل جنرل برائے فن لینڈ مسٹر ولی ایرولا اور ورٹسیلا (Wärtsilä) کے مڈل ایسٹ کے ریجنل ڈائریکٹر مسٹر الیگزانڈر ایکر مین کے ساتھ ملاقات کی، جس میں توانائی کے شعبے میں ممکنہ تعاون پر بات چیت ہوئی۔ ملاقات میں پاکستان اور فن لینڈ کے درمیان تیل، گیس، معدنیات اور قابل تجدید توانائی کے شعبوں میں دوطرفہ تعاون کو بڑھانے پر توجہ مرکوز کی گئی۔ گفتگو میں بائیو ماس کے شعبے میں فنش مہارت اور تحقیق کے مواقع، نیز جھمپیر میں ونڈ فارمز کو سپلیمنٹ کرنے کے لیے جن سیٹس کی منتقلی پر تبادلہ خیال کیا گیا۔
وزیر علی پرویز ملک نے پاکستان کے توانائی کے شعبے کو جدید بنانے کے عزم کو اجاگر کیا اور توانائی کی کارکردگی بہتر بنانے اور ماحولیاتی اثرات کو کم کرنے کے لیے ورٹسیلا کے جدید ٹیکنالوجی حل کو خوش آئند قرار دیا۔ انہوں نے غیر ملکی سرمایہ کاروں کو سہولت فراہم کرنے اور طویل مدتی شراکت داریوں کو فروغ دینے کی حکومتی کوششوں پر روشنی ڈالی ، مسٹر ایرولا اور مسٹر ایکر مین نے پاکستان کے ساتھ تعلقات کو گہرا کرنے کے لیے دلچسپی کا اظہار کیا اور پاکستان کو ایک اہم سرمایہ کاری کے مقام کے طور پر سراہا۔ قونصل جنرل نے کہا کہ پاکستان کو عالمی سرمایہ کاروں کی اس طرح کی توجہ حاصل ہونا ایک خوش آئند بات ہے۔ ورٹسیلا، جو ایک فنش کمپنی ہے اور توانائی کے شعبے میں اسمارٹ ٹیکنالوجیز کا عالمی رہنما ہے، پاکستان میں بجلی کے منصوبوں کے علاوہ ریکوڈک منصوبے پر بھی کام کر رہی ہے۔ ملاقات کے اختتام پر بائیو ماس کے مواقع تلاش کرنے اور توانائی کے شعبے میں مسلسل تعاون کو آگے بڑھانے پر باہمی اتفاق ہوا، جو پائیدار توانائی کی ترقی کے مشترکہ وژن کو اجاگر کرتا ہے.
