راولپنڈی(سٹاف رپورٹر)پارکس اینڈ ہارٹیکلچر اتھارٹی راولپنڈی کی جانب سے شہر بھر کے پارکس اور گرین بیلٹس کی سجاوٹ،خوبصورتی میں اضافے اور عوام کو بہترین تفریحی سہولیات فراہم کرنے کے حوالے سے ڈی جی پی ایچ اے راولپنڈی احمد حسن رانجھا کی خصوصی ہدایات کی روشنی میں اہم اقدامات اٹھائے جا رہے ہیں،ڈی جی پی ایچ اے احمد حسن رانجھا کی ہدایات پر پی ایچ اے نے راول پارک کی تزین و آرائش کا کام سرانجام دیا ہے،
راول پارک میں رنگ برنگے موسمی پھول پودوں کی بہار کا سماں دکھائی دیتا ہے،جس سے پارک کے حسن میں اضافہ ہوا ہے،سجاوٹ دل کو موہ لینے والے خوبصورت پھول اور سرسبز مناظر عوام کی توجہ کا مرکز بنے ہوئے ہیں،عوام جوک در جوک راول پارک کا رُخ کرتے ہیں.
بہترین تفریحی سہولیات سے لطف اندوز ہوتے ہیں،پی ایچ اے کی جانب سے ڈی جی پی ایچ اے احمد حسن رانجھا کی خصوصی ہدایات پر راول پارک میں بہترین سیکیورٹی کے انتظامات بھی کئے گئے ہیں،تاکہ پارک میں تفریح کے لئے آنے والے اپنے آپ کو محفوظ تصور کر سکیں،اس کے علاوہ پی ایچ اے کا عملہ نہایت محنت اور لگن سے ہارٹیکلچر کا کام اور پھول پودوں کی نگہداشت کا کام بھی سرانجام دے رہا ہے،ڈی جی پی ایچ اے احمد حسن رانجھا کا کہنا تھا کہ عوام کی سہولت اور تفریح کے لئے تمام وسائل بروئے کار لائیں گے،راولپنڈی کو سرسبز بنانے کے مشن پر کاربند ہیں.
راولپنڈی کو خوبصورت بنانے،شجرکاری کو فروغ دینے اور عوام کو ایک اچھا تفریحی ماحول فراہم کرنے کےلئے تمام ضروری اقدامات اٹھا رہے ہیں،ڈی جی پی ایچ اے احمد حسن رانجھا نے مزید کہا کہ پارکس کی خوبصورتی کو برقرار رکھنے کے لئے پی ایچ اے کا عملہ ہمہ وقت مصروفِ عمل ہے،چاہتے ہیں کہ عوام کو صحت مند اور سرسبز ماحول فراہم کریں تاکہ ہیٹ ویو اور موسم کی شدت کے اثرات کو کم کیا جا سکے،انھوں نے کہا کہ پنجاب حکومت کے وژن کے مطابق راولپنڈی شہر میں شجرکاری کو بھی فروغ دیا جا رہا ہے جس سے ماحولیاتی آلودگی کو کم کیا جا سکتا ہے.
