لاہور (سٹاف رپورٹر )وفاقی وزیر توانائی اویس لغاری نے کہا ہے کہ سیلاب سے متاثرہ علاقوں میں بجلی صارفین کو خصوصی ریلیف فراہم کیا جائے گا، پانی اترتے ہی بجلی بحالی کا عمل جلد مکمل ہو گا،لیسکو ملازمین نے ایک دن کی تنخواہ وزیر اعظم کے سیلاب فنڈ میں دی ہے ،ملازمین اور صارفین کی سیفٹی پر سمجھوتہ نہیں کیا جائے گا ۔ان خیالات کا اظہار انہوں نے جمعہ کے روز یہاں لیسکو ہیڈکوارٹر میں ایک اجلاس سے خطاب کرتے ہوئے کیا ۔اس موقع پر لیسکو بی او ڈی چیئرمین ،چیف ایگزیکٹو لیسکو نے وفاقی وزیر اویس لغاری کو سیلاب متاثرین کیلئے ملازمین کی ایک دن کی تنخواہ کا امدادی چیک دیا۔
وفاقی وزیر اویس لغاری نے کہا کہ جن علاقوں میں سیلاب آیا ہے وہاں صارفین کو ریلیف دیں گے، سیلاب متاثرین کے بجلی کے بلوں کی تاریخ میں توسیع بھی دی جائیگی، اگر سیلاب متاثرین کے بجلی بلز کیلئے حکومت کوئی مدد کا اعلان کر ے گی تو ڈسکوز بل معاف کر سکیں گی ۔انہوں نے کہا کہ سیلابی پانی کے باعث بجلی بحالی کا عمل متاثر ہے،سیلابی پانی اترتے ہیں بجلی بحالی کا عمل جلد مکمل کر لیا جائے گا۔انہوں نے کہا کہ پاکستان میں تین کروڑ تیس لاکھ میں سے ایک کروڑ80 لاکھ صارفین 70 فیصد ڈسکائونٹ پر بجلی لے رہے ہیں جبکہ سیلاب سے متاثرہ علاقوں میں صارفین کو خصوصی ریلیف فراہم کیا جائے گا۔
وفاقی وزیر نے کہا کہ لوگ سولر پینل لگا کر خود کو200 یونٹ سے نیچے لے کرگئے جس سے بجلی کی قیمت سستی ہوئی ہے اور بلوں میں فرق آیا ہے،حکومت کے موثر اقدامات کی بدولت بجلی کے نرخوں میں واضح کمی ہوئی ہے اور جو لوگ یہ تبدیلی محسوس نہیں کر رہے ان کی آنکھوں پر پٹی بندھی ہے۔
اویس لغاری نے کہا کہ نیٹ میٹرنگ والے نئے آئی پی پیز بننے جا رہے ہیں،نیٹ میٹرنگ کی وجہ سے4 روپے فی یونٹ بوجھ عوام پر پڑے گا جسے حکومت کسی صورت نظرانداز نہیں کرے گی۔انہوں نے کہا کہ واپڈا کی نجکاری کاعمل شروع ہو چکا ہے،محکمے میں رائٹ سائزنگ کر رہے ہیں،انہوں نے واضح کیا کہ موجودہ حکومت پر سیاسی بھرتیوں کا الزام نہیں لگایا جا رہا کیونکہ اختیارات کی جنگ لڑنے کے بجائے ہم نے کمپنی کو با اختیار بنایا ہے
