اسلام آباد (ًسٹاف رپورٹر )وزیراعظم محمد شہباز شریف قطر کا ایک روزہ دورہ مکمل کر کے واپس وطن روانہ ہو گئے۔ جمعرات کو وزیراعظم آفس کے میڈیا ونگ سے جاری بیان کے مطابق وزیر اعظم نے دوحہ میں امیر قطر شیخ تمیم بن حمد الثانی سے ملاقات کی۔
ملاقات میں وزیر اعظم نے دوحہ پر بلاجواز اسرائیلی جارحیت اور بین الاقوامی قوانین کے صریح منافی حملے کے تناظر میں امیر قطر اور قطرکے عوام سے یکجہتی کا اظہار کیا۔ وزیر اعظم نے قطر اور پاکستان کے مابین دیرینہ تاریخی برادرانہ تعلقات کا ذکر کیا جو مشترکہ مذہب اور اقدار پر مبنی ہیں۔ وزیراعظم نے کہا کہ پاکستان نے قطر کا ہمیشہ ہر مشکل وقت میں ساتھ دیا اور دیتا رہے گا۔
ملاقات میں اسرائیل کے خطے کے مختلف ممالک پر بلاجواز حملوں اور مسلسل جارحیت کے ساتھ ساتھ خطے میں امن کے قیام کیلئے مشاورت کی گئی۔ ملاقات میں نائب وزیر اعظم و وزیر خارجہ محمد اسحاق ڈار، وزیر دفاع خواجہ محمد آصف، وزیر اطلاعات و نشریات عطاء اللہ تارڑ اور معاون خصوصی طارق فاطمی بھی موجود تھے۔
