اسلام آباد(کرائم رپورٹر )ایف آئی اے کمپوزٹ سرکل گوادر نے ایک بڑی کارروائی کرتے ہوئے غیر قانونی طریقے سے سمندر کے راستے ایران جانے کی کوشش ناکام بنا دی۔ کارروائی کے دوران ایرانی شہری سمیت 29 افراد کو گرفتار کر لیا گیا۔
ایف آئی اے کے مطابق گرفتار ملزمان کا تعلق پاکستان کے مختلف شہروں سے ہے جن میں:
بنوں کے 6
فیصل آباد کے 4
مالاکنڈ کے 5
ملتان اور خانیوال کے 4
بونیر کے 2 جبکہ دیگر ملزمان کا تعلق حافظ آباد، وزیرستان، وزیرآباد اور کراچی سے ہے۔
حیران کن طور پر ایک ایرانی شہری بھی گرفتار افراد میں شامل ہے۔ تمام افراد کو بلوچستان کے علاقے جیوانی سے گرفتار کیا گیا، جہاں سے وہ غیر قانونی طور پر کشتی کے ذریعے ایران جانے کی کوشش کر رہے تھے ابتدائی تفتیش میں انکشاف ہوا ہے کہ ملزمان کا منصوبہ تھا کہ وہ ایران سے آگے دیگر یورپی یا خلیجی ممالک میں داخل ہوں۔ ایف آئی اے نے تمام ملزمان کے خلاف مقدمات درج کر کے تفتیش کا آغاز کر دیا ہے ایف آئی اے حکام کے مطابق انسانی اسمگلنگ کی روک تھام کے لیے کارروائیاں جاری رہیں گی اور ملک کے سرحدی علاقوں میں نگرانی مزید سخت کر دی گئی ہے۔
