اسلام آباد (سٹاف رپورٹر )سی ڈی اے مزدور یونین کی جانب سے سولہ ستمبر بروز منگل ہونے والے احتجاج کے حوالے سے سی بی اے کمیٹی انوائرمنٹ ڈائریکٹوریٹ کے زیراہتمام ایک اہم اجلاس منعقد ہوا جس میں جنرل سیکرٹری چوہدری محمد یٰسین، صدر اورنگزیب خان،حاجی صابر،چوہدری زاہد احمد،اظہر خان تنولی،راجہ رئیس،نمبردارلیاقت،ملک رزاق،چوہدری صغیر،محمد سرفرازملک،شیر محمد سیالوی سمیت دیگر عہدیداران اور ملازمین نے کثیر تعداد میں شرکت کی اجلاس سے خطاب کرتے ہوئے مقررین نے کہا کہ سی ڈی اے مزدور یونین ایک قانونی اور منتخب نمائندہ تنظیم ہے جو ہمیشہ ملازمین کے حقوق کے تحفظ کے لیے جدوجہد کرتی رہی ہے۔ یونین قیادت نے کہا کہ سپریم کورٹ اور اسلام آباد ہائی کورٹ کے واضح فیصلوں کے باوجود سی ڈی اے انتظامیہ ملازمین کے پلاٹوں کی الاٹمنٹ میں لیت و لعل سے کام لے رہی ہے، جس سے ملازمین شدید مایوسی اور اضطراب کا شکار ہیں۔
مزدوررہنماؤں نے کہا کہ پلاٹوں کی الاٹمنٹ ملازمین کا بنیادی حق ہے اور کسی بھی تاخیر کو مزید برداشت نہیں کیا جائے گا۔ انہوں نے کہا کہ احتجاجی پروگرام میں ملازمین کی بھرپور شرکت اس بات کا ثبوت ہوگی کہ مزدور اپنے حقوق کے حصول کے لیے متحد ہیں اجلاس میں یہ بھی فیصلہ کیا گیا کہ اگر سی ڈی اے انتظامیہ نے فوری طور پر عدالتوں کے فیصلوں پر عمل درآمد نہ کیا تو احتجاج کو مزید وسعت دی جائے گی اور اس کا دائرہ کار پورے شہر تک بڑھایا جائے گا انھوں نے انتظامیہ کو خبردار کیا کہ ملازمین کے صبر کا مزید امتحان نہ لیا جائے اور پلاٹوں کی الاٹمنٹ میں تاخیر ختم کر کے فوراً فیصلہ کیا جائے۔ انہوں نے کہا کہ مزدوراپنے مطالبات کے حصول کے لیے کسی قربانی سے دریغ نہیں کریں گے۔
