لاہور (سٹاف رپورٹر )مون سون بارشوں کا 11 واں سپیل کل بروز منگل سے شروع ہوگا ۔ترجمان پی ڈی ایم اے کے مطابق16 سے19 ستمبر تک پنجاب کے بیشتر اضلاع میں شدید بارشوں کی پیشگوئی کی گئی ہے صوبائی دارالحکومت لاہور ،راولپنڈی، مری گلیات ،اٹک،چکوال،جہلم،گوجرانولہ، گجرات ، سیالکوٹ، نارووال، حافظ آباد، منڈی بہاوالدین، اوکاڑہ، ساہیوال، قصور، جھنگ، سرگودھا، اور میانوالی میں بارشوں کا امکان ہے۔
ترجمان کے مطابق موسلا دھار بارشوں کے باعث18 اور 19 ستمبر کے دوران راولپنڈی، مری، گلیات کے ندی نالوں میں بہائو کے اضافے کا امکان ہے وزیراعلی پنجاب کی ہدایات کے پیش نظر صوبہ بھر کے کمشنرز اور ڈپٹی کمشنرز الرٹ ہیں۔ مون سون بارشوں کے باعث بڑے شہروں کے ندی نالوں میں بھی طغیانی کا خدشہ ہے اس حوالے سے محکمہ صحت، آبپاشی، تعمیر و مواصلات، لوکل گورنمنٹ اور لایئو سٹاک کو الرٹ جاری کر دیاگیا ہے۔ ڈی جی عرفان علی کاٹھیا نے شہریوں سے اپیل کرتے ہوئے کہا کہ خراب موسم کی صورتحال میں احتیاطی تدابیر اختیار کر یں، دریائوں کے اطراف اکٹھے ہونے اور سیرو تفریح سے گریز کریں، آ ندھی و طوفان کی صورتحال میں محفوظ مقامات پر رہیں غیر ضروری سفر سے گریز کریں اور ایمرجنسی صورتحال میں پی ڈی ایم اے ہیلپ لائن 1129 پر رابطہ کریں۔
