اسلام آباد (سٹاف رپورٹر)صدرِ مملکت آصف علی زرداری نے کہا ہے کہ پاکستان کا بحری شعبہ قومی تجارت اور معاشی استحکام کی ریڑھ کی ہڈی ہے، بحری ترقی، قومی ترقی کی ضامن ہے۔ عالمی یومِ بحری تجارت 2025 کے موقع پر پیر کو ایوان صدر کے پریس ونگ سے جاری اپنے خصوصی پیغام میں صدر مملکت آصف علی زرداری نے کہا کہ پاکستان کا بحری مستقبل روشن اور پائیدار ہے۔بندرگاہوں کی ترقی، ڈیجیٹائزیشن اور جدیدیت حکومت کی ترجیح ہے۔پاکستان کا بحری شعبہ قومی تجارت اور معاشی استحکام کی ریڑھ کی ہڈی ہے۔صدر مملکت نے کہا کہ کراچی اور پورٹ قاسم کی اپ گریڈیشن جاری ہے، علاقائی تجارتی مراکز میں بدلنے کے لیے پرعزم ہیں۔انہوں نے کہا کہ بحری پالیسیوں میں اصلاحات جاری ہیں اور قومی شپنگ کو عالمی سطح پر مسابقتی بنایا جا رہا ہے۔
انہوں نے کہا کہ پاکستانی شپنگ کمپنیوں کے لیے مراعات، غیر ملکی انحصار میں کمی کا باعث بنیں گی ،فریٹ سکیورٹی میں بہتری اور زرِ مبادلہ کی بچت کے لیے اہم اقدامات جاری ہیں۔پاکستان سنگل ونڈو کے تحت پورٹ کمیونٹی سسٹم کا مرحلہ وار نفاذ جاری ہے۔بندرگاہی آپریشنز کی ڈیجیٹائزیشن سے پورا سپلائی چین مربوط ہو گا۔صدر مملکت نے کہا کہ عالمی معیار کے مطابق اصلاحات قومی مفادات اور علاقائی انضمام کے لیے ضروری ہیں۔پاکستان عالمی بحری برادری کا ذمہ دار رکن بن کر ابھر رہا ہے۔انہوں نے کہا کہ بحری شعبے میں یکجہتی اور اعلیٰ کارکردگی کے ذریعے پائیدار ترقی کا عزم رکھتے ہیں۔
بہتر پالیسیوں اور محنت سے مضبوط بحری مستقبل کی تعمیر ممکن ہے۔پاکستان کو بین الاقوامی سطح پر باوقار، پائیدار اور جدید بحری قوم بنایا جائے گا۔صدر مملکت نے کہا کہ بحری شعبے میں سرمایہ کاری سے تجارتی حجم میں اضافہ ہوگا اور روزگار کے مواقع میسر آئیں گے۔بندرگاہوں کی جدیدیت پاکستان کو علاقائی ٹریڈ گیٹ وے میں تبدیل کرے گی۔پاکستان عالمی تجارتی سپلائی چین کا کلیدی حصہ بننے کے لیے تیار ہے۔بحری شعبے میں تمام اسٹیک ہولڈرز کو ساتھ لے کر چلیں گے۔
