راولپنڈی (سٹاف رپورٹر)ڈائریکٹر جنرل کنزہ مرتضیٰ راولپنڈی ڈویلپمنٹ اتھارٹی کے زیرِ صدارت جمخانہ میں ایک خصوصی اجلاس منعقد ہوا، جس کا مقصد راولپنڈی شہر میں جاری اور آئندہ ترقیاتی منصوبوں کا جائزہ لینا اور مستقبل کا لائحہ عمل ترتیب دینا تھا۔ اجلاس میں انفراسٹرکچر کی بہتری، ماحولیاتی پائیداری، اور شہری خوبصورتی سے متعلق امور پر تفصیلی غور و خوض کیا گیا۔ اجلاس کے دوران ڈی جی آر ڈی اے نے سیکریٹری جمخانہ کو ہدایت کی کہ جمخانہ کی حدود میں ایک جدید لائبریری اور نالج سینٹر قائم کیا جائے، تاکہ علم، تحقیق، اور کمیونٹی انگیجمنٹ کو فروغ دیا جا سکے۔ اجلاس میں درج ذیل اہم اقدامات پر گفتگو کی گئی: جمخانہ کے گرد گرین بیلٹ کی تعمیر، تاکہ ماحولیاتی معیار میں بہتری لائی جا سکے، واٹر ری سائیکلنگ سسٹم کی تنصیب، تاکہ پانی کے پائیدار استعمال کو ممکن بنایا جا سکے.
مری روڈ، شیرپاؤ کالونی، اور اصغر مال روڈ سمیت اہم علاقوں کی خوبصورتی کے منصوبے اور تجاوزات کا خاتمہ تاکہ شہر کی ترتیب برقرار رکھی جا سکے اور ممکنہ نقصانات سے بچا جا سکے۔ ڈی جی آر ڈی اے کنزہ مرتضیٰ نے اس موقع پر کہا کہ ان ترقیاتی منصوبوں کی کامیابی کے لیے عوامی تعاون اور مختلف محکموں کے مابین مؤثر روابط نہایت ضروری ہیں۔ انہوں نے کہا کہ یہ اقدامات آر ڈی اے کے اس عزم کی عکاسی کرتے ہیں جس کا مقصد راولپنڈی کو ایک صاف، سرسبز، اور منظم شہر بنانا ہے۔ انہوں نے مزید کہا کہ شہری ترقی کو عوامی مفاد پر مبنی، پائیدار، اور جامع ہونا چاہیے۔ ان منصوبوں کے ذریعے نہ صرف شہر کی خوبصورتی میں اضافہ ہوگا بلکہ شہریوں کے معیارِ زندگی میں بھی بہتری آئے گی۔ آر ڈی اے ان منصوبوں پر جلد عملی کام کا آغاز کر رہا ہے اور ان کا وقتاً فوقتاً جائزہ بھی لیا جاتا رہے گا، تاکہ بروقت اور مؤثر عملدرآمد کو یقینی بنایا جا سکے۔ اجلاس میں سیکریٹری جمخانہ سید رضوان مشہدی، چیف پلانر آر ڈی اے محمد طاہرمیو، ڈائریکٹر فنانس آر ڈی اے مسعود ارشد سمیت دیگر افسران نے شرکت کی.
