اسلام آباد(سٹاف رپورٹر)وفاقی وزیر برائے موسمیاتی تبدیلی و ماحولیاتی ہم آہنگی، سینیٹر ڈاکٹر مصدق ملک نے آج وفاقی جمہوریہ جرمنی کے سفارتخانے کی ڈپٹی ہیڈ آف کوآپریشن محترمہ ہیلین پاؤسٹ، گلوبل گرین گروتھ انسٹیٹیوٹ (GGGI) اور اقوامِ متحدہ کے ماحولیاتی پروگرام (UNEP-CCC) کے نمائندگان سے ملاقات کی ، ملاقات میں Supporting Preparedness for Article 6 Cooperation (SPAR6C) پروگرام کے تحت پاکستان کے کاربن مارکیٹ کے قواعد و ضوابط، قیمتوں کے تعین کے طریقۂ کار، اور گورننس فریم ورک کو مضبوط بنانے کے لیے مشترکہ اہداف پر تبادلہ خیال کیا گیا۔ گفتگو کے دوران اس امر پر روشنی ڈالی گئی کہ پاکستان اب تیاری کے مرحلے سے عملی نفاذ کی جانب بڑھ رہا ہے تاکہ ایک شفاف، قابلِ اعتماد اور عالمی معیار کی دیانت داری پر مبنی کاربن مارکیٹ قائم کی جا سکے۔
اس موقع پر سینیٹر ڈاکٹر مصدق ملک نے کہا:“کاربن مارکیٹس صرف کریڈٹس کے تبادلے تک محدود نہیں بلکہ ان کا مقصد موسمیاتی اقدامات کی منصفانہ قدر کو یقینی بنانا ہے، تاکہ ہر کم کی جانے والی ٹن اخراج سے ہمارے عوام اور معیشت کو حقیقی فائدہ پہنچے۔ ایس پار 6 سی پروگرام کے تحت یہ اشتراک پاکستان کی پالیسی، ریگولیٹری اور مالیاتی ڈھانچے کو مضبوط بنانے میں معاون ثابت ہوگا، تاکہ موسمیاتی مالیات کے حصول، جدت کے فروغ، اور قومی سطح پر طے شدہ ماحولیاتی اہداف (NDCs) کے حصول کے لیے پائیدار، مارکیٹ پر مبنی نظام تشکیل دیا جا سکے.
