اسلام آباد (سٹاف رپورٹر)وفاقی وزیرِ پیٹرولیم علی پرویز ملک نے روس کے شہر سینٹ پیٹرز برگ میں ہونے والے انٹرنیشنل گیس فورم میں پاکستان کی نمائندگی کی، جہاں انہوں نے توانائی اور معدنیات کے شعبے میں پاکستان اور روس کے درمیان تعاون کو مزید فروغ دینے کے عزم کا اظہار کیا فورم کے دوران علی پرویز ملک نے عالمی سطح کے اقتصادی اور توانائی سے وابستہ رہنماؤں سے اہم ملاقاتیں کیں۔ انہوں نے ایک اعلیٰ سطحی پینل سیشن سے خطاب کرتے ہوئے پاکستان میں توانائی کے شعبے میں کی جانے والی اصلاحات کو عالمی برادری کے سامنے پیش کیا۔ انہوں نے بتایا کہ وزیرِ اعظم محمد شہباز شریف کی قیادت میں پاکستان میں توانائی کے شعبے میں سرمایہ کاری کے فروغ کے لیے جامع اصلاحات متعارف کرائی گئی ہیں۔
علی پرویز ملک نے بین الاقوامی سرمایہ کاروں کو پاکستان منرلز انویسٹمنٹ فورم کے آئندہ ایڈیشن میں شرکت کی دعوت بھی دی سینٹ پیٹرز برگ فورم کے سائیڈ لائن پر وفاقی وزیرِ پیٹرولیم کی ترکیہ کے وزیرِ توانائی الپرسلان بیرقطار سے ملاقات ہوئی، جس میں باہمی توانائی تعاون پر تبادلہ خیال کیا گیا اس کے علاوہ، روسی توانائی کمپنی گیز پروم کے چیئرمین ایلیکسی ملر سے ملاقات میں پاکستان کی اوجی ڈی سی ایل اور گیز پروم کے درمیان شراکت داری کو وسعت دینے پر اتفاق ہوا۔
وفاقی وزیر نے روس کی جیولوجیکل سروے کمپنی “رسجیو” اور توانائی کی مصنوعی ذہانت پر مبنی کمپنی “نیڈرا ڈیجیٹل” کے نمائندوں سے بھی ملاقات کی، جس میں پاکستان میں ممکنہ سرمایہ کاری کے امکانات پر گفتگو کی گئی یہ دورہ پاکستان کے توانائی و معدنیات کے شعبے میں عالمی سرمایہ کاری کو فروغ دینے اور روس کے ساتھ اسٹریٹجک تعاون کو مضبوط بنانے کی جانب ایک اہم قدم قرار دیا جا رہا ہے۔
