اسلام آباد(کرائم رپورٹر)ایف آئی اے اینٹی ہیومن ٹریفکنگ سرکل اسلام آباد نے ڈی جی ایف آئی اے رفعت مختار کی خصوصی ہدایات پر انسانی اسمگلنگ میں ملوث عناصر کے خلاف جاری کریک ڈاؤن کے دوران ایک بڑی کامیابی حاصل کرتے ہوئے بدنام زمانہ انسانی اسمگلر کو گرفتار کر لیا۔
کارروائی کے دوران ملزم رضوان عرف شاہ کو اسلام آباد سے گرفتار کیا گیا، جو کروڑوں روپے کے ویزا فراڈ اور انسانی اسمگلنگ میں ملوث تھا۔ ملزم کے قبضے سے جعلی دستاویزات، پاسپورٹس اور دیگر اہم ثبوت برآمد کیے گئے۔
ایف آئی اے حکام کے مطابق رضوان عرف شاہ نے “مہربان انٹرپرائز” کے نام سے جعلی کمپنی قائم کر رکھی تھی، جس کے ذریعے وہ لوگوں کو بیرون ملک، خصوصاً کینیڈا میں ملازمت کا جھانسہ دے کر بھاری رقوم ہتھیا رہا تھا۔ متاثرہ شہری کی شکایت پر کاروائی عمل میں لائی گئی، جس کے مطابق ملزم نے صرف ایک شخص سے 1 کروڑ 32 لاکھ روپے کا فراڈ کیا۔
ملزم ایف آئی اے کو پہلے سے ہی متعدد مقدمات میں مطلوب تھا۔ اسے حراست میں لے کر مزید تفتیش کا آغاز کر دیا گیا ہے۔ ایف آئی اے کا کہنا ہے کہ انسانی اسمگلنگ میں ملوث دیگر عناصر کی گرفتاری کے لیے تمام تر وسائل بروئے کار لائے جا رہے ہیں اور کریک ڈاؤن جاری ہے۔
