وزیراعظم شہباز شریف نے سابقہ حکومت کی جانب سے بند کیے گئے نیشنل کمانڈ اینڈ آپریشن سینٹر (این سی او سی) کو فوری بحال کرنے کی ہدایت جاری کردی۔
ملک میں اومیکرون وائرس کی نئی ساخت کے کیس رپورٹ ہونے کا وزیر اعظم نے نوٹس لیا ہے۔
انہوں نے ہدایت کی ہے کہ این سی او سی فوری بحال کی جائے۔
وزیر اعظم شہباز شریف نے وزارتِ قومی صحت سے موجودہ صورتحال کے متعلق رپورٹ بھی طلب کرلی ہے۔
گزشتہ روز پاکستان میں اومیکرون کے نئے سب ویریئنٹ کے پہلے کیس کی تصدیق ہوئی ہے۔
قومی ادارہ صحت (این آئی ایچ) کے مطابق پاکستان میں ’جینوم‘ کی ترتیب کے ذریعے سب ویریئنٹ کی تصدیق ہوئی۔
نئے ویریئنٹ کی وجہ سے مختلف ممالک میں کیسز کی تعداد میں بھی اضافہ ہو رہا ہے۔
این آئی ایچ کی جانب سے اومیکرون کے نئے ویریئنٹ سے بچاؤ کے لیے کہا گیا ہے کہ بہترین احتیاطی تدابیر اختیار کریں اور کورونا ویکسینیشن کروائیں۔
این آئی ایچ نے عوام سے اپیل کرتے ہوئے کہا ہے کہ اپنی ابتدائی ویکسین مکمل کروائیں، ویکسینیشن مکمل ہونے کے 6 مہینے کے بعد بوسٹر ڈوز لگوائیں۔
