اسلام آباد(کامرس رپورٹر) پاک۔بھارت جنگ بندی اور مسلح افواج کی عسکری برتری کے پاکستان کی معاشی صورتحال پر مثبت اثرات مرتب ہوئے ہیں اور پیر کو پاکستان اسٹاک مارکیٹ میں ریکارڈ تیزی دیکھی گئی، کے ایس ای 100 انڈیکس 9 ہزار 466 پوائنٹس اضافے کیساتھ 8.12 فیصد بڑھ گیا۔پاکستان سٹاک ایکسچینج کی طرف سے دستیاب معلومات کے مطابق کاروباری ہفتے کے آغاز پر پیر کی صبح زبردست تیزی کا رجحان دیکھا گیا، سرمایہ کاروں کی طرف سے سرمایہ کاری میں اضافے کے بعد کے ایس ای 100 انڈیکس 9 ہزار 466 پوائنٹس سے بڑھ کر ایک لاکھ 16 ہزار 466 پوائنٹس کی سطح پر پہنچ گیا۔
جمعہ کو انڈیکس ایک لاکھ 7 ہزار 174 پوائنٹس پر بند ہوا تھا۔سرمایہ کاروں نے 5 ارب 87 کروڑ 57 لاکھ 47 ہزار 103 روپے مالیت کے 12 کروڑ 49 لاکھ 28 ہزار 589 حصص کے 25 ہزار 795 سودے کیے، مجموعی طور پر 331 کمپنیوں کے حصص کا کاروبار ہوا، جن میں سے 320 کمپنیوں کے شیئرز کی مالیت میں اضافہ ہوا، صرف 5 کمپنیوں کے شیئرز کی قیمتوں میں کمی ہوئی، 6 کمپنیوں کے حصص کی قیمتیں برقرار رہیں۔10 مئی کو پاک فوج کی جانب سے بھارت کے خلاف آپریشن ’بنیان مرصوص‘ کی کامیاب تکمیل کے بعد سرمایہ کاروں کا مورال بڑھ چکا ہے،جنہوں نے آٹو موبائل سمبلر، آٹوموبائل سپیئر پارٹس، کیبل اینڈ الیکٹریکل گڈز، سیمنٹ، کیمیکل، کمرشل بینکوں، انجینئرنگ، فرٹیلائزر، فوڈ ایند پرسنل کیئر گڈز، گلاس اینڈ سرامکس، انشورنس، ٹیکنالوجی اینڈ کمیونیکیشن اور ٹرانسپورٹ کے شعبہ جات سمیت دیگر سیکٹرز میں بھرپور سرمایہ کاری کی ہے۔
کے ایس ای 100 انڈیکس کے علاوہ آل شیئر 5 ہزار 404 پوائنٹس، کے ایس ای 30 انڈیکس 3 ہزار 20 پوائنٹس، کے ایم آئی انڈیکس 14 ہزار 852 پوائنٹس اور بی کے ٹی آئی انڈیکس 2 ہزار 346 پوائنٹس بڑھے ہیں۔پاکستان اور بھارت کے درمیان حالیہ جنگ بندی کے اعلان کے بعد خطے میں کشیدگی کم ہونے کی امید پیدا ہوئی ہے ، معاشی تجزیہ کاروں کے مطابق جنگ کے خطرات میں کمی آنے سے سرمایہ کاروں کا اعتماد بحال ہوا ہے جس کے مثبت اثرات پاکستان اسٹاک مارکیٹ پر دیکھنے کو مل رہے ہیں۔سرمایہ کاروں کی بڑھتی ہوئی دلچسپی کے باعث مارکیٹ میں تیزی دیکھی جا رہی ہے۔
اگر موجودہ امن قائم رہتا ہے تو ماہرین کا ماننا ہے کہ پاکستان اسٹاک ایکسچینج (پی ایس یکس ) چند روز میں اپنی بلند ترین سطح تک پہنچ سکتی ہے۔ماہرین کے مطابق خطے میں امن کی فضا سے نہ صرف سرمایہ کاری کو فروغ ملے گا بلکہ معیشت میں بھی بہتری آئے گی جو مہنگائی اور بیروزگاری جیسے مسائل سے نمٹنے میں مددگار ثابت ہو سکتی ہے۔
