اسلام آباد (کرائم رپورٹر)آئی جی اسلام آباد سید علی ناصر رضوی کا شہر کے مختلف علاقوں کا دورہ ، آئی جی اسلام آباد نے افطار ،سحری اور نماز کے اوقات میں مساجد اورامام بارگاہوں کی سکیورٹی کو چیک کیا،ڈیوٹی پر مامور پولیس افسران سے ملے اور انہیں شاباش دی،مساجد ڈیوٹیز انتہائی اہمیت کی حامل ہیں،ان اوقات میں کوئی سینئر پولیس افسر گھر پر موجود نہ ہو،قبل ازیں آئی جی اسلام آباد نے سینئر پولیس افسران کے ہمراہ پولیس لائنز ہیڈکوارٹرز میں پولیس افسران کے ساتھ روزہ بھی افطار کیا۔
تفصیلات کے مطابق انسپکٹر جنرل آف پولیس اسلام آباد سید علی ناصر رضوی نے شہر کے مختلف علاقوں کا دورہ کیا،انہوں نے افطار ،سحری اور نماز کے اوقات میں مساجد اورامام بارگاہوں کی سکیورٹی کو چیک کیا،ڈیوٹی پر مامور پولیس افسران سے ملاقات کی اور انہیں شاباش دی،جبکہ ڈیوٹی میں غفلت برتنے پر ایس ایچ او آبپارہ اور ایس ایچ او شالیمار کو شوکاز نوٹس جاری کردئیے اور تین سینئر پولیس افسران سے فیلڈ میں موجود نہ ہونے پر وضاحت طلب کرلی،اس موقع پر انہوں نے کہا کہ رمضان المبارک کے مقدس مہینہ میں مساجد اور امام بارگاہوں کی ڈیوٹیز انتہائی اہمیت کی حامل ہیں،ان اوقات میں کوئی سینئر پولیس افسر گھر پر موجود نہ ہو،تمام ڈی آئی جیز، ایس ایس پیزاور ایس پیز خود فیلڈ میں نظر آئیں،فرائض میں ادائیگی ہر گز برداشت نہیں کی جائے گی.
انہوں نے سینئر پولیس افسران کو احکامات جاری کرتے ہوئے کہا کہ سکیورٹی ڈیوٹیز پر موجود تمام افسران کو بروقت ڈیوٹی پوائنٹس پر سحری و افطاری پہنچائی جائے،سخت موسم کے باوجود پولیس فورس کے یہ افسران عوام کی جان و مال کے تحفظ کے لئے الرٹ کھڑے ہیں،اپنے بچوں سے دور ،ان پولیس افسران کی اصل عبادت ہی شہر اور شہریوں کی حفاظت ہے،تمام افسران اپنی ڈیوٹیوں کو عبادت سمجھ کر کریں ،مساجد اور امام بارگاہوں کی سکیورٹی ڈیوٹی میں غفلت ہرگز برداشت نہیں کی جائے گی ،قبل ازیں پولیس لائنز ہیڈکوارٹرز اسلام آباد میں پولیس افسران کے لئے افطار ڈنر کا اہتمام بھی کیا گیاتھا،جس میںآئی جی اسلام آباد سید علی ناصر رضوی اور سینئر پولیس افسران نے دیگر پولیس افسران کے ہمراہ روزہ افطار کیا۔
