اسلام آباد(کرائم رپورٹر)ایس ایس پی سکیورٹی محمد سرفراز ورک نے اپنے دفتر میں پولیس افسران کے مسائل سنے اور ان کے حل کے لئے احکامات جاری کئےتفصیلات کے مطابق سینئر سپر ٹنڈنٹ آف پولیس سکیورٹی ڈویژن محمد سر فراز ورک نے اپنے دفتر میں پولیس افسران کے مسائل سنے ، سنگین نوعیت کے معاملات پر سینئر پولیس افسران کو از سر نو انکوائریاں مکمل کرنے کی ہدایت کی،جبکہ پولیس افسران کے باقی مسائل کو ترجیحی بنیادوں پر مکمل کرنے کے لئے متعلقہ افسران کو احکامات جاری کئے.
اس موقع پر انہوں نے کہا کہ اسلام آبادپولیس کے افسران کو درپیش محکمانہ اور ذاتی نوعیت کے مسائل کے بروقت اور ترجیحی بنیادوں پر حل کو یقینی بنانا ہماری اولین ترجیح ہے،انسپکٹر جنرل آف پولیس اسلام آباد سید علی ناصر رضوی کے خصوصی احکامات پر تمام سینئر پولیس افسران اپنے دفاتر میں اردل روم کا انعقاد کر رہے ہیں اور پولیس افسران کے مسائل کو سن کر ان کے حل کے لئے احکامات جاری کر رہے ہیں ،پولیس افسران کی ویلفیئر کے لئے متعدد اقدامات بھی کئے گئے ہیں جن میں رہائش ، بہترین طبی سہولیات اور تعلیم کے معیار کو بہتر بنانا شامل ہیں.
ایس ایس پی سکیورٹی نے افسران سے کہا کہ آپ کو کسی بھی قسم کا مسئلہ درپیش ہو تو میر ے دفتر کادروازہ آپ کے لئے ہمیشہ کھلا ہے، ہم سب نے مل کر اس شہر کی بہتری میں اپنا کردار ادا کرنا ہے،انہوں نے مزید کہا کہ اردل روم کے انعقاد کا مقصد پولیس افسران کی ویلفئیر، ذاتی و سرکاری مسائل کو ترجیحی بنیادوں پر حل کرنے کے ساتھ ان کے مورال کو بلند کرنا ہے.
