راولپنڈی(کرائم رپورٹر)سٹی ٹریفک پولیس راولپنڈی کا چاند رات اور عید الفطر کے موقع پر ون ویلنگ کرنے والوں سے آہنی ہاتھوں سے نمٹنے کا فیصلہ، ون ویلنگ کی روک تھام کے لیے خصوصی ٹیمیں تشکیل، شہر بھر میں ناکہ بندی کی جائے گئی ، تفصیلات کے مطابق چیف ٹریفک آفیسر راولپنڈی نے چاند رات اور عید الفطر پر ون ویلنگ کرنیوالوں کے نام اپنے پیغام میں کہا کہ ون یلنگ ایک خونی اور جان لیوا کھیل ہے ، جس سے ہر سال سیکڑوں بچے اپنی قیمتی جانیں گنوا بیٹھتے ہیں اور متعدد معذور بھی ہوجاتے ہیں۔ون ویلنگ کرنیوالے نہ صرف اپنی جان کے لئے خطرہ ہیں بلکہ دوسرے روڈ یوزرکی جان و مال کے نقصان کا باعث بھی بنتے ہیں ۔
چاند رات اور عید الفطر پر ون ویلنگ کی روک تھام کےلئے سپیشل سکواڈ تشکیل دینے کیساتھ خصوصی پکٹس بھی قائم کی جارہی ہیں جو راولپنڈی شہر کی مختلف شاہراہوں جن میں پشاور روڈ، اولڈ ائیر پورٹ روڈ ،مری روڈ،جہلم روڈ اور سکستھ روڈ وغیرہ پر ون یلنگ کرنیوالوں کے خلاف سخت اور بلا تفریق قانونی کاروائی عمل میں لائیں گے، اس سلسلہ میں 60 سے زائد اہلکار تعینات کیے گۓ ھیں ، سی ٹی او راولپنڈی کا کہنا تھا کہ والدین سے گزارش ہے کہ اپنے بچوں کو حادثات سے محفوظ بنانے اور ون ویلنگ کی روک تھام کےلئے سٹی ٹریفک پولیس راولپنڈی کا ساتھ دیں۔
عید الفطر اور خاص دنوں میں اپنے بچوں پر خصوصی نظر رکھیں اور کم عمری میں انھیں موٹر سائیکل، گاڑی دینے سے گریز کریں ، تا کہ آپ کو کسی قسم کی قانونی پریشانی کا سامنا نہ کرنا پڑے۔ ان کا مزید کہنا تھا کہ راولپنڈی پولیس ایسے تمام مکینکس جو ون ویلنگ کےلئے موٹر سائیکلوں کی آلٹریشن کرتے ہیں ان کی خفیہ طور پر مانیٹرنگ کر رہی ہے اور جومکینک اس گھناؤنے کھیل میں ملوث پایا گیا اس کے خلاف بھی سخت قانونی کاروائی عمل میں لاتے ہوئے باقاعدہ ایف آئی آرز درج کروائی جائیں گی۔
