اسلام آباد(کرائم رپورٹر)ڈی آئی جی ہیڈکوارٹرز /سکیورٹی سید علی رضا کا نجی ہوٹل کا دورہ سکیورٹی ڈیوٹی پر تعینات پولیس افسران سے ملاقات کی اورٹیموں کے سکیورٹی انتظامات کا جائزہ لیا،افسران کو سکیورٹی کے حوالے سے اہم ہدایات جاری کیں،ٹیموں کی آمدورفت کے دوران تمام ادارے الرٹ رہیں اور مکمل کوآرڈینیشن کو یقینی بنائیں۔
تفصیلات کے مطابق ڈپٹی انسپکٹر جنرل آف پولیس اسلام آباد سید علی رضا نے نجی ہوٹل کا دورہ کیا،سکیورٹی ڈیوٹی پر تعینات پولیس افسران سے ملاقات کی اور پاکستان سپر لیگ 2025کیلئے آنے والے ملکی و غیر ملکی کھلاڑیوں کے سکیورٹی انتظامات کا جائزہ لیا،ڈی آئی جی ہیڈکوارٹرز /سکیورٹی نے تمام پولیس افسران کو موثر سکیورٹی انتظامات کو یقینی بنانے کیلئے اہم ہدایات جاری کیں.
انہوں نے کہا کہ ٹیموں کی آمدورفت کے دوران تمام قانون نافذ کرنیوالے ادارے مکمل کوآرڈینیشن کو یقینی بناتے ہوئے اپنے فرائض منصبی سرانجام دیں اور الرٹ رہیں، ڈیوٹی پرتعینات ہر اہلکار سکیورٹی کارڈ لازمی آویزاں کرے،انہوں نے مزید کہا کہ شہریوں کو روٹس کے اوقات کے بارے آگاہی فراہم کی جائے اورتمام داخلی و خارجی راستوں پر چیکنگ کو مزید موثر بنایا جائے،اسلام آباد پولیس اپنے تمام تروسائل کا بھرپور استعمال کرتے ہوئے تمام غیرملکی مہمانان اور کھلاڑیوں کو بھرپور سکیورٹی فراہم کرے گی اورملکی وقار اور تشخص کوبرقرار رکھنے کے لئے ہر ممکن کوشش کو یقینی بنائے گی.
