اسلام آ باد (کرائم رپورٹر)اسلام آباد ٹریفک پولیس کے ہفتہ وار بازاروں میں ٹریفک کی روانی برقرار رکھنے کے لئے موثر اقدامات ڈی ایس پی انڈسٹریل ایریا عبدالحفیظ نے بازار ڈیوٹی پر مامور ٹریفک افسران کو اپنے فرائض منصبی بہتر طریقے سے سرانجام دینے کے متعلق بریفنگ دی۔
تفصیلات کے مطابق انسپکٹرجنرل آف پولیس اسلام آباد سید علی ناصر رضوی کی خصوصی ہدایات کی روشنی میں اسلام آباد ٹریفک پولیس نے ہفتہ وار بازاروں میں ٹریفک کی روانی برقرار رکھنے کے لئے مو¿ثر اقدامات کئے،ان اقداما ت کا مقصد شہریوں کو ٹریفک جام اور مشکلات سے محفوظ رکھنا اور بازاروں کے اردگرد منظم ٹریفک نظام کو برقرار رکھنا تھا،اس سلسلہ میں ڈی ایس پی انڈسٹریل ایریا عبدالحفیظ نے بازار ڈیوٹی پر مامور ٹریفک افسران کو اپنے فرائض منصبی بہتر طریقے سے سرانجام دینے کے متعلق بریفنگ دی .
انہوں نے افسران کو فرائض کی انجام دہی میں کوتاہی نہ برتنے کی ہدایت کی،ٹریفک پولیس کی نفری کو تمام داخلی و خارجی راستوں، پارکنگ ایریاز اور حساس مقامات پر تعینات کیا گیا ہے تاکہ کسی بھی قسم کی بدنظمی یا رکاوٹ سے بچا جا سکے،چیف ٹریفک پولیس آفیسر اسلام آباد کیپٹن ریٹائرڈ سید ذیشان حیدر نے شہریوں سے اپیل کی ہے کہ وہ اپنی گاڑیاں مختص کردہ پارکنگ ایریاز میں ہی پارک کریں تاکہ ٹریفک کی روانی متاثر نہ ہو، خلاف ورزی کی صورت میں قانونی کارروائی عمل میں لائی جائے گی، جس میں گاڑی کا چالان اور دیگر اقدامات شامل ہیں،انہوںنے مزید کہا کہ اسلام آباد ٹریفک پولیس شہریوں کی سہولت اور نظم و ضبط کے لیے ہمہ وقت مستعد ہے،شہری ٹریفک قوانین کی پابندی کر کے مہذب شہری ہونے کا ثبوت دیں،شہریوں کی جان و مال کا تحفظ اور وفاقی دارالحکومت میں ٹریفک کی روانی کو برقرار رکھنا اسلام آباد پولیس کی اولین ترجیحات میں شامل ہے۔
