اسلام آباد (کرائم رپورٹر)آئی جی اسلام آباد کاامن وامان کی صورتحال اور فورس کے انتظامی امور کے حوالے سے اہم اجلاس اسلام آبادکی سیکیورٹی صورتحال، پولیس فورس کے انتظامی امور اور حساس تنصیبات و مقامات کی حفاظت کیلئے کیے گئے اقدامات کا تفصیلی جائزہ لیا ،جبکہ ڈپلومیٹک ایریا کی سیکیورٹی کو مزید موثر بنانے کیلئے سیکیورٹی پروٹوکولز کی ازسرِ نو ترتیب دینے کی ہدایت کی۔
تفصیلات کے مطابق انسپکٹر جنرل آف پولیس اسلام آباد سید علی ناصررضوی نے امن وامان کی صورتحال اور فورس کے انتظامی امور کے حوالے سے سنٹرل پولیس آفس اسلام آباد میںاہم اجلاس کا انعقاد کیا،اجلاس میں ڈی آئی جی ہیڈکوارٹرز محمد ہارون جوئیہ اور ڈی آئی جی سیکیورٹی سید علی رضا نے شرکت کی، اجلاس میں آئی جی اسلام آباد سیدعلی ناصررضوی نے وفاقی دارالحکومت کی سیکیورٹی صورتحال، پولیس فورس کے انتظامی امور اور حساس تنصیبات و اہم مقامات کی حفاظت کیلئے کیے گئے اقدامات کا تفصیلی جائزہ لیا ،انہوں نے ریڈ زون اور ڈپلومیٹک ایریا کے داخلی و خارجی راستوں پر سیکیورٹی کو مزید موثر بنانے، وی آئی پی سیکیورٹی پروٹوکولز کی ازسرِ نو ترتیب دینے اور جدید ٹیکنالوجی کے استعمال سے نگرانی کے نظام کو بہتر بنانے کیلئے احکامات جاری کئے.
آئی جی اسلام آباد نے ہدایت کی کہ انٹیلی جنس شیئرنگ، کوآرڈی نیشن اور ایمرجنسی رسپانس میکانزم کو مزید فعال بنایا جائے،انہوں نے مزید کہا کہ پولیس فورس کی پیشہ ورانہ تربیت میں اضافہ، نفری کی استعدادِ کار میں بہتری اور دستیاب وسائل کو موثر انداز میں بروئے کار لانے کے لیے جامع اقدامات کیے جائیں.
