آئی جی اسلام آباد کا وفاقی دارالحکومت میں منظم ٹریفک انتظامات کیلئے اجلاس کا انعقاد

اسلام آباد (کرائم رپورٹر)آئی جی اسلام آباد کا وفاقی دارالحکومت میں منظم ٹریفک انتظامات کیلئے اجلاس کا انعقاد ٹریفک قوانین پر سختی سے عمل درآمد کو یقینی بنانے، یوم آزادی کی تقریبات کے دوران شاہراہوں پر مو¿ثر ٹریفک مینجمنٹ، شہریوں کو متبادل راستوں کی بروقت فراہمی اور عوام میں ٹریفک قوانین سے متعلق آگاہی مہم کو مزید فعال بنانے پر تفصیلی تبادلہ خیال کیا گیا۔

تفصیلات کے مطابق انسپکٹر جنرل آف پولیس اسلام آباد سیدعلی ناصررضوی نے وفاقی دارالحکومت میں منظم ٹریفک انتظامات کیلئے سنٹرل پولیس آفس اسلام آباد میں اہم اجلاس کا انعقاد کیا،اجلاس میںایس پی ٹریفک، ڈی ایس پیز، انسپکٹرز سمیت دیگر پولیس افسران نے شرکت کی،اجلاس میں ٹریفک قوانین پر سختی سے عمل درآمد کو یقینی بنانے سمیت 13 اور 14 اگست کی تقریبات کے دوران شاہراہوں پر مو¿ثر ٹریفک مینجمنٹ، شہریوں کو متبادل راستوں کی بروقت فراہمی اور عوام میں ٹریفک قوانین سے متعلق آگاہی مہم کو مزید فعال بنانے پر تفصیلی تبادلہ خیال کیا گیا.

آئی جی اسلام آباد نے دوران اجلاس عوامی سہولیات کے لیے احکامات جاری کرتے ہوئے کہا کہ تمام پولیس افسران ٹریفک کے متعلق عوامی سہولیات پر توجہ دیں،تعلیمی اداروں اور اہم مقامات پرٹریفک پولیس سے متعلقہ موبائل خدمات مہیا کی جائیں،مارکیٹ کمیٹیوں کے ساتھ مل کر اہم تجارتی مقامات سے غیر قانونی پارکنگ کابھی خاتمہ کیا جائے،اسلام آباد ٹریفک پولیس ایف ایم ریڈیو کو مزید فعال کیا جائے،افسران اپنے ماتحت ملازمان کی ویلفیئر کیلئے ٹھوس اقدامات کریں،انہوں نے مزید کہا کہ عوام کی سہولت، ٹریفک کی روانی اور سڑکوں پر نظم و ضبط قائم رکھنے کے لیے تمام دستیاب وسائل بروئے کار لائے جائیں .

شہریوں کی جان و مال کے تحفظ کو یقینی بناتے ہوئے وفاقی دارالحکومت میں امن و امان کے قیام سمیت مربوط ٹریفک کا نظام اسلام آباد پولیس کی اولین ترجیحات میں شامل ہے۔