اسلام آبا د (کرائم رپورٹر )اسلام آباد ٹریفک پولیس کی شہر میں مربوط ٹریفک نظام کو یقینی بنانے اور ٹریفک قوانین کی خلاف ورزیوں پر بلا تفریق قانونی کارروائیاں جاری،گزشتہ ہفتے کے دوران ٹریفک قوانین کی خلاف ورزیوں پر9600سے زائدگاڑیوں، موٹر سائیکل سواروں ،مال برداراور عوامی نقل و حمل کی گاڑیوں کے خلاف قانونی کارروائیاں عمل میں لائیں گئیں۔
تفصیلات کے مطابق انسپکٹر جنرل آف پولیس اسلا م آبادکی خصوصی ہدایت پر اسلام آباد ٹریفک پو لیس وفاقی دارالحکومت میں شہریوں کو ہر ممکن سفری سہولیات فراہم کرنے کے لئے ہمہ وقت کوشاں ہے اور ٹریفک قوانین کی خلاف ورزی کرنے والوں کیخلاف بلاامتیاز قانونی کارروائیاں عمل میں لا کر حادثات کی روک تھام اور ٹریفک کی روانی کو برقرار رکھنے کے لئے ہمہ وقت مصروف عمل ہے،اس سلسلہ میں گزشتہ ہفتے کے دوران اسلام آباد ٹریفک پولیس نے ٹریفک قوانین کی خلاف ورزیوں پر9600سے زائدگاڑیوں ،موٹر سائیکل سواروں ،مال بردار اور عوامی نقل و حمل والی گاڑیوں کے خلاف قانونی کارروائیاں کی گئی،اسلام آبادٹریفک پولیس نے خصوصی مہم کے تحت828 غیرنمونہ نمبر پلیٹس،797 بغیر ہیلمنٹ،1556غیر قانونی پارکنگ ،630 غلط سمت کے استعمال ،713ٹریفک سگنل کی خلاف ورزی، 53بغیر لائسنس ،535لین قوانین کی خلاف ورزی،2738اوورلوڈنگ گاڑیوں اورفٹنس سرٹیفکیٹ نہ ہونے پر52ڈرائیورز کیخلاف قانونی کارروائیاں عمل میں لائی گئیں .
جبکہ وفاقی دارالحکومت میں رکشے کے داخلے پر پابندی کی خلاف ورزی کرنے والے 287 رکشہ ڈرائیورز کیخلاف بھی قانونی کاروائیاں عمل میں لائی گئیں اسی طرح ڈرون ٹیکنالوجی کا استعمال کرتے ہوئے 73 ڈرائیورز کو چالان دئیے گئے اور 45 ڈرائیورز کو آگاہی فراہم کی گئی،چیف ٹریفک آفیسر اسلام آباد کیپٹن )ر( سید ذیشان حیدر نے شہریوں سے اپیل کی کہ وہ دورا ن ڈرائیونگ ٹریفک قوانین کی پاسداری کرتے ہوئے اسلام آباد ٹریفک پولیس سے تعاون کریں تاکہ شہر میں مربوط ٹریفک کے نظام کو برقرار رکھتے ہوئے ٹریفک قوانین پر عملدرآمد کو یقینی بنایا جاسکے، اسلام آباد ٹریفک پولیس حادثات کی روک تھام اور قانون کی بالا دستی کو مساوی بنیادوں پر یقینی بنانے کیلئے ہر ممکن اقدامات کر رہی ہے۔
