پشارو ( کرائم رپورٹر)ڈی جی ایف آئی اے رفعت مختار راجہ کی ہدایت پر حوالہ ہنڈی اور غیر قانونی کرنسی ایکسچینج میں ملوث نیٹ ورکس کے خلاف کریک ڈاؤن جاری ہے۔ ایف آئی اے پشاور زون نے کمرشل بینکنگ سرکل پشاور اور کمپوزٹ سرکل ایبٹ آباد کی مشترکہ کارروائیوں کے دوران غیر قانونی کرنسی ایکسچینج میں ملوث تین ملزمان کو گرفتار کر لیا ہے۔
گرفتار ملزمان میں ساحل، افغان جان اور سعد شامل ہیں، جنہیں مانسہرہ اور پشاور سے گرفتار کیا گیا۔ چھاپہ مار کارروائیوں کے دوران ملزمان کے قبضے سے مجموعی طور پر 50 ہزار امریکی ڈالر، 22,700 سعودی ریال، 2,150 یو اے ای درہم، 1,060 یورو، 29,500 افغانی، 255 برطانوی پاؤنڈز اور 75,200 پاکستانی روپے برآمد کیے گئے ، اس کے علاوہ ملزمان سے کینیڈین ڈالر، قطری ریال اور کویتی دینار بھی ضبط کیے گئے ہیں۔ ملزمان بغیر لائسنس غیر قانونی کرنسی کی ایکسچینج میں ملوث پائے گئے اور برآمد ہونے والی کرنسی کے حوالے سے حکام کو تسلی بخش جواب فراہم کرنے میں ناکام رہے۔
ایف آئی اے حکام کا کہنا ہے کہ ملزمان سے غیر قانونی کرنسی ایکسچینج سے متعلق دیگر اہم شواہد بھی برآمد کر لیے گئے ہیں۔ گرفتار ملزمان کے خلاف تفتیش کا آغاز کر دیا گیا ہے اور مزید کارروائی کے لیے قانونی اقدامات کیے جا رہے ہیں۔
یہ کارروائی ملک میں غیر قانونی مالیاتی سرگرمیوں کے خاتمے اور حوالہ ہنڈی نیٹ ورکس کو توڑنے کے سلسلے میں ایک اہم قدم قرار دی جا رہی ہے۔ ایف آئی اے کی ٹیمز مختلف علاقوں میں غیر قانونی کرنسی ایکسچینج نیٹ ورکس کی جڑوں تک پہنچنے کے لیے مسلسل کارروائیاں کر رہی ہیں۔
