اسلام آباد (کرائم رپورٹر )اسلام آبادپولیس ایم ٹی سیکشن سے ریٹائرڈ ہونے والے پولیس ملازمین کے اعزاز میں الوداعی تقریب کا انعقاد ایس پی ہیڈکوارٹرز سید سجاد حیدر بخاری نے ریٹائرڈ ہونے والے پولیس ملازمین کو اعزازی پولیس شیلڈز پیش کی اور ان کے مستقبل کے لئے نیک تمناﺅ ں کا اظہار کیا۔
تفصیلات کے مطابق اسلام آبادپولیس ایم ٹی سیکشن سے ریٹائرڈ ہونے والے پولیس ملازمین کے اعزاز میں پولیس لائنز ہیڈکوارٹرزمیں الوداعی تقریب کا انعقادکیا گیا،تقریب میں سپرٹینڈنٹ آف پولیس ہیڈکوارٹرز سید سجاد حیدر بخاری نے بطور مہمان خصوصی شرکت کی، اس موقع پر ڈی ایس پی ہیڈکوارٹرز سمیت دیگر پولیس افسران بھی موجود تھے، ایس پی ہیڈکوارٹرز نے ریٹائر ڈ ہونے والے پولیس ملازمین کی محکمہ پولیس کے لئے کی گئی خدمات کو سراہتے ہوئے کہا کہ ریٹائرمنٹ سروس کا حصہ ہے جس نے سروس شروع کی وہ ایک دن ریٹائرڈ بھی ہو گا،آپ نے ایک لمبا عرصہ محکمہ پولیس کی خدمت کی ہے، دوران سروس ہم سب کی کوشش ہونی چاہیے کہ ایسے کام کیے جائیں جس سے آپ کا نام روشن ہو اور آپ کے کردار کو اچھے الفاظ میں یاد رکھا جائے.
ہمیں اس بات کا عہد کرنا چاہیے کہ سروس کے دوران زیادہ سے زیادہ عوامی خدمت کرکے اللہ کی خوشنودی حاصل کی جائے،انہوں نے کہا کہ آپ نے اپنا زندگی کا قیمتی حصہ محکمہ پولیس میں گزار کر عوام کی خدمت کی، اس کے بدلے محکمہ پولیس نے بھی آپ کو عزت،وقار اور ایک مقام دیا جس پر آپ کو اللہ کا شکر گزار ہونا چاہیے،انہوں نے مزید کہا کہ آپ کو کوئی بھی نجی و سرکاری مسئلہ درپیش ہو تو میرے دفتر کا دروازہ ہر وقت کھلا ہے، اس موقع پر ریٹائرڈ ہونیوالے پولیس ملازمین نے عزت افزائی پر خوشی کا اظہار کرتے ہوئے ایس پی ہیڈکوارٹرز کا شکریہ ادا کیا ،تقریب کے آخر میں مہمان خصوصی نے ریٹائرڈ ہونے والے پولیس ملازمین کی خدمات کو سراہتے ہوئے انہیں اعزازی پولیس شیلڈ زپیش کیں اور ان کے مستقبل کیلئے نیک خواہشات کا اظہار کیا.
