اسلام آباد (کرائم رپورٹر )ایس ایس پی سکیورٹی کی زیر صدارت ساوتھ افریقہ کرکٹ ٹیم کے دورہ اسلام آباد ، راولپنڈی کے دوران سکیورٹی کے متعلق اہم اجلاس کرکٹ ٹیموں کی آمدورفت کے دوران روٹ کی جدید ٹیکنالوجی اور ڈرون کیمروں کے ذریعے نگرانی کی جائے گی، 800 سے زائد پولیس افسران و جوان سکیورٹی ڈیوٹی کے فرائض سرانجام دیں گے، قانون نافذ کرنے والے اداروں کے ساتھ مکمل ہم آہنگی کو یقینی بنایا جائے گا۔
تفصیلات کے مطابق سینئر سپر ٹینڈنٹ آف پولیس سکیورٹی کیپٹن ریٹائرڈ سید ذیشان حیدر کی زیر صدارت ساﺅتھ افریقہ کرکٹ ٹیم کے دورہ اسلام آباد، راولپنڈی کے دوران سکیورٹی کے حوالے سے اہم اجلاس منعقد ہو اجس میں جڑواں شہروں کے سینئر پولیس افسران سمیت دیگر قانون نافذکرنے والے اداروں کے افسران نے شرکت کی۔اجلاس میں دورہ ساﺅتھ افریقہ کرکٹ ٹیم کی سکیورٹی کے متعلق جزیات پر تبصرہ کیا گیا، اجلاس میں فیصلہ کیا گیا کہ راولپنڈی پولیس اور دیگر قانون نافذکرنے والے اداروں کے ساتھ مکمل ہم آہنگی سے فول پروف سکیورٹی انتظامات کو یقینی بنایا جائے گا اور ٹیموں کے آمدورفت کے دوران روٹس کی نگرانی جدید ٹیکنالوجی اور ڈرونز کے ذریعے کی جائے گی ، سکیورٹی پر 800 سے زائد پولیس افسران و جوان اپنے فرائض منصبی سرانجام دیں گے جبکہ دیگر قانون نافذ کرنے والے اداروں کے ساتھ مکمل ہم آہنگی اور معلومات کے تبادلے کو بہتر بنایا جائے گا.
اس موقع پر ایس ایس پی سیکورٹی نے تمام افسران کو ہدایات دیں کہ دورہ کرکٹ ٹیم سے پہلے ضلع بھر میں سرچ آپریشنز کئے جائیں ، سپیشل برانچ معلومات اکٹھی کرکے متعلقہ حکام تک پہنچانے کو یقینی بنائے ، افسران ڈیوٹی بھیجنے سے پہلے اہلکاروں کو ڈیوٹی کی نوعیت کے بارے میں بریف کریں گے اور بہترین اور تربیت یافتہ عملے کو ڈیوٹی پر تعینات کیا جائے ، آخر میں ایس ایس پی سکیورٹی اور تمام افسران نے اس عزم کا اعادہ کیا کہ مہمان کرکٹ ٹیم کے اس انتہائی اہم دورہ کے دوران اسلام آباد پولیس بھرپورسکیورٹی کو یقینی بنانے کے لئے کو ئی کسر نہیں چھوڑے گی،اسلام آباد پولیس ملکی وقار اور تشخص کوبرقرار رکھنے کے لئے ہر ممکن اقدامات اٹھائے گی.
