اسلام آباد کی انسداد دہشت گردی عدالت نے پاکستان تحریک انصاف (پی ٹی آئی) کے گرفتار ارکان قومی اسمبلی کی ضمانت منظور کر لی۔
عدالت نے تمام کیسز میں پی ٹی آئی کے اراکین قومی اسمبلی کی ضمانت 30،30 ہزار روپے مچلکوں کے بدلے منظور کرتے ہوئے ان کی فوری رہائی کا حکم دیا۔
ضمانت کی درخواستوں پر سماعت انسداد دہشت گردی عدالت کے جج ابو الحسنات محمد ذوالقرنین نے کی۔ پراسیکیوٹر نے بتایا کہ ایم این اے احمد چٹھہ مقدمے میں نامزد ہیں اور جو دفعات ان پر عائد کی گئی ہیں ان کی کم از کم سزا 3 سال ہے، لہذا ضمانت منظور نہ کی جائے۔ جج ابو الحسنات محمد ذوالقرنین نے استفسار کیا کہ شیر افضل مروت، احمد چٹھہ اور دیگر ارکان قومی اسمبلی کے خلاف کچھ برآمد ہوا ہے؟ جس پر پراسیکیوٹر نے جواب دیا کہ کچھ برآمد نہیں ہوا۔
پی ٹی آئی کے گرفتار ارکان قومی اسمبلی میں شیر افضل مروت، شیخ وقاص، ایک قریشی، احمد چٹھہ، عامر ڈوگر، یوسف خان، نعیم علی شاہ، اویس حیدر جکھڑ، شاہ احد اور زبیر خان شامل ہیں۔ پی ٹی آئی ایم این ایز پر تھانہ سنگجانی، ترنول، نون اور تھانہ سنبل میں دہشت گردی کے الزامات کے تحت مقدمات درج ہیں۔
