اسلام آباد۔ ترجمان دفتر خارجہ نے بتایا ہے کہ وزیر اعظم پاکستان شہباز شریف 23 سے 27 ستمبر 2024 تک نیو یارک میں اقوام متحدہ کی 79ویں جنرل اسمبلی کے اعلیٰ سطح اجلاس میں شرکت کریں گے۔ وزیر اعظم 27 ستمبر کو جنرل اسمبلی سے خطاب کریں گے، جس میں وہ پاکستان کی کثیر الجہتی حمایت کا اعادہ کریں گے۔
ترجمان کے مطابق، وزیر اعظم عالمی امن، سلامتی اور اقوام متحدہ کے کردار کی بھرپور حمایت کریں گے۔ وہ سلامتی کونسل کے ایجنڈے پر موجود دیرینہ مسائل، جیسے مسئلہ فلسطین اور تنازعہ جموں و کشمیر کی اہمیت پر بھی زور دیں گے۔
وزیر اعظم شہباز شریف اپنے خطاب میں بین الاقوامی اقتصادی تعلقات میں موجود ناانصافیوں کو دور کرنے اور عالمی مالیاتی ڈھانچے میں اصلاحات کی ضرورت پر بھی بات کریں گے۔ علاوہ ازیں، وہ ماحولیاتی تبدیلیوں اور اسلاموفوبیا کے بڑھتے ہوئے رجحان کے خلاف عالمی برادری سے فوری اقدامات کی اپیل کریں گے۔
ان کے دورے کے دوران، وزیر اعظم مختلف اعلیٰ سطحی اجلاسوں میں شرکت کریں گے، جن میں “سمندر کی سطح میں اضافے کے خطرے پر اعلیٰ سطح اجلاس” بھی شامل ہے۔ ترجمان دفتر خارجہ نے بتایا کہ وہ متعدد عالمی رہنماؤں سے ملاقاتیں کریں گے اور پائیدار ترقی کے ایجنڈے پر بات چیت کریں گے، جن میں اقوام متحدہ کے سیکریٹری جنرل اور صدر جنرل اسمبلی کے ساتھ دو طرفہ ملاقاتیں بھی شامل ہوں گی۔
