اسلام آباد۔حکومت اور آزاد پاور کمپنیوں (آئی پی پیز) کے درمیان تصفیوں کے سلسلے میں معاہدے ختم کرنے کا عمل جاری ہے، اور حکومت کے ساتھ ایک اور آئی پی پی نے سیٹلمنٹ ایگریمنٹ کے تحت اپنا پاور معاہدہ ختم کر لیا ہے۔
رپورٹس کے مطابق، میسرز روش پاکستان پاور لمیٹڈ نے حکومت سے پاور پرچیز معاہدہ ختم کرنے کی اطلاع پاکستان اسٹاک ایکسچینج (پی ایس ایکس) کی انتظامیہ کو دے دی ہے۔
پی ایس ایکس کو بھیجے گئے خط میں بتایا گیا ہے کہ میسرز روش پاکستان پاور کمپنی، آلٹرن انرجی لمیٹڈ کے ماتحت کام کرتی ہے۔
خط میں مزید کہا گیا ہے کہ حکومت اور صدر پاکستان کی فراہم کردہ گارنٹی کی بنیاد پر کمپنی نے یہ معاہدہ ختم کیا ہے۔ اس کے علاوہ، خط میں یہ بھی ذکر کیا گیا کہ کمپنی نے حکومت کی سینٹرل پاور پرچیزنگ ایجنسی سے اپنے تمام واجبات وصول کر لیے ہیں اور پاور کمپلیکس کو حکومت کے زیر انتظام نیشنل پاور پارکس مینجمنٹ کمپنی کے حوالے کر دیا گیا ہے۔
