اسلام آباد ۔وزیرِاعظم شہباز شریف نے مظفر آباد کا ایک روزہ دورہ کیا جہاں آزاد کشمیر کی قانون ساز اسمبلی میں پولیس کے مستعد دستے نے انہیں گارڈ آف آنر پیش کیا۔
اپنے دورۂ آزاد کشمیر کے دوران وزیراعظم نے آل پارٹیز حریت کانفرنس کے قائدین سے ملاقات کی اور کہا کہ یومِ یکجہتی کشمیر کے موقع پر ہم اپنے کشمیری بھائیوں اور بہنوں کی اخلاقی، سفارتی اور سیاسی معاونت کی تجدید کرتے ہیں۔
وزیراعظم شہباز شریف کا کہنا تھا کہ کشمیری عوام نے حق خود ارادیت کے لیے جو قربانیاں دی ہیں، وہ رائیگاں نہیں جائیں گی۔ عالمی برادری کو بھارت کی جارحانہ پالیسیوں اور انسانی حقوق کی خلاف ورزیوں کے خلاف مؤثر اقدامات کرنے کی ضرورت ہے۔
انہوں نے مزید کہا کہ جموں و کشمیر کا مسئلہ پاکستان کی خارجہ پالیسی کا بنیادی ستون ہے اور رہے گا۔ پاکستان کشمیری عوام کی اقوام متحدہ کی سلامتی کونسل کی قراردادوں کے مطابق حق خود ارادیت کے حصول تک اپنی غیر متزلزل اخلاقی، سفارتی اور سیاسی حمایت جاری رکھے گا۔
وزیراعظم نے وفاقی وزیر انجینئر امیر مقام کو ہدایت دی کہ وہ آزاد جموں و کشمیر میں مہاجرین کے مسائل اور تحفظات کے حل کے لیے جامع حکمت عملی مرتب کریں۔ اس موقع پر آل پارٹیز حریت کانفرنس کے رہنماؤں نے وزیراعظم اور حکومتِ پاکستان کی جانب سے کشمیری عوام کے ساتھ یکجہتی کے اظہار پر انہیں خراجِ تحسین پیش کیا اور تحریکِ آزادی کشمیر کی مسلسل حمایت کو سراہا۔
حریت قائدین نے مسئلہ کشمیر کو اقوام متحدہ کے فورم پر اجاگر کرنے پر وزیراعظم کی کاوشوں کی تعریف کی۔ ملاقات میں وزیراعظم آزاد جموں و کشمیر چوہدری انوار الحق، وفاقی وزرا احسن اقبال، رانا تنویر حسین، انجینئر امیر مقام، عطا اللہ تارڑ، کشمیری رہنما غلام نبی صفی، ایڈووکیٹ پرویز، اعجاز رحمانی، سید گلشن، محمد اشرف ڈار، شاہین اقبال، مشتاق احمد، خورشید احمد خان اور راجا خادم حسین شاہین موجود تھے۔
