وزیراعظم شہباز شریف نے زور دیا ہے کہ 1967ء کی سرحدوں کے مطابق ایک خودمختار فلسطینی ریاست کا قیام ناگزیر ہے، جس کا دارالحکومت القدس شریف ہو۔
یہ بات انہوں نے دبئی میں ورلڈ گورنمنٹس سمٹ سے خطاب کرتے ہوئے کہی۔
وزیراعظم نے کہا کہ یہ عالمی سمٹ مستقبل کے چیلنجز اور مواقع پر اجتماعی غوروفکر کے لیے ایک مؤثر پلیٹ فارم ہے۔ انہوں نے اس موقع پر دوٹوک مؤقف اختیار کرتے ہوئے کہا کہ 1967ء کی سرحدوں پر مشتمل آزاد فلسطینی ریاست کا قیام ضروری ہے۔
ان کا مزید کہنا تھا کہ غزہ میں جاری ظلم و ستم کے نتیجے میں 50 ہزار فلسطینی شہید ہو چکے ہیں، اور فلسطین کا مسئلہ اقوام متحدہ کی قراردادوں کے مطابق حل ہونا چاہیے۔ ایک پائیدار اور دیرپا امن صرف دو ریاستی حل کے ذریعے ہی ممکن ہے، جس میں آزاد فلسطینی ریاست کا دارالحکومت القدس شریف ہو۔
انہوں نے پاکستان کی معیشت پر روشنی ڈالتے ہوئے کہا کہ گزشتہ سات دہائیوں میں پاکستانی قوم کو بے شمار چیلنجز کا سامنا رہا، تاہم ہمارا ’’اڑان پاکستان‘‘ منصوبہ قومی اقتصادی ترقی کا ایک انقلابی پروگرام ہے، جو ملک کی معیشت میں استحکام اور ترقی کے نئے مواقع پیدا کرے گا۔
