اسلام آباد۔ترکیہ کے صدر رجب طیب اردوان نے کہا ہے کہ وہ دہشت گردی کے خلاف جنگ میں پاکستان کی مکمل حمایت کرتے ہیں اور مسئلہ کشمیر کے حل کے لیے پاکستان کی کوششوں کی تائید کرتے ہیں۔ انہوں نے مزید کہا کہ پاکستان اور ترکیہ مل کر آزاد فلسطینی ریاست کے قیام کے لیے اپنی کوششیں جاری رکھیں گے۔
یہ بات انہوں نے وزیراعظم ہاؤس میں وزیراعظم شہباز شریف کے ہمراہ پاکستان اور ترکیہ کے درمیان 24 معاہدوں اور ایم او یوز پر دستخط کی تقریب میں خطاب کے دوران کہی۔
قائداعظم اور علامہ اقبالؒ ہمارے بھی ہیرو ہیں
صدر اردوان نے کہا کہ پاکستان میرا دوسرا گھر ہے اور یہاں آکر خوشی محسوس ہوتی ہے۔ انہوں نے قائداعظم محمد علی جناحؒ اور علامہ اقبالؒ کو خراج تحسین پیش کرتے ہوئے کہا کہ یہ دونوں ہمارے بھی ہیرو ہیں، اور علامہ اقبالؒ کی شاعری نے دنیا میں انقلاب برپا کیا۔
پاکستان اور ترکیہ عظیم قومیں ہیں
انہوں نے کہا کہ پاکستان اور ترکیہ کے درمیان 24 معاہدوں اور مفاہمتی یادداشتوں پر اتفاق ہوا ہے۔ صدر پاکستان آصف علی زرداری سے بھی ملاقات ہوئی، جس میں تجارتی امور پر تبادلہ خیال کیا گیا۔ دونوں ممالک کے درمیان تعلقات کو مزید مضبوط بنانے پر اتفاق ہوا ہے۔
تجارتی حجم پانچ ارب ڈالر تک بڑھانے پر اتفاق
طیب اردوان نے کہا کہ ترکیہ اپنے سرمایہ کاروں کو پاکستان میں سرمایہ کاری کی ترغیب دے رہا ہے، اور دونوں ممالک نے تجارتی حجم کو پانچ ارب ڈالر تک بڑھانے پر اتفاق کیا ہے۔ دفاع اور دفاعی پیداوار کے شعبوں میں تعاون پر بھی بات چیت ہوئی۔
پاکستان کی دہشت گردی کے خلاف قربانیوں کا اعتراف
انہوں نے کہا کہ پاکستان نے دہشت گردی کے خلاف بڑی قربانیاں دی ہیں، اور ترکیہ دہشت گردی کے خلاف جنگ میں پاکستان کی مکمل حمایت کرتا ہے۔ انہوں نے دہشت گردی کے خلاف شہید ہونے والوں کے اہل خانہ سے اظہار تعزیت بھی کیا۔
تعلیم کے شعبے میں تعاون
ترک صدر نے کہا کہ ترکیہ کی معارف فاؤنڈیشن کے اسکول پاکستان کے تعلیمی شعبے میں اہم کردار ادا کریں گے۔
مسئلہ کشمیر پر پاکستان کی حمایت
انہوں نے کہا کہ ترکیہ مسئلہ کشمیر کے حل کے لیے پاکستان کی کوششوں کی مکمل حمایت کرتا ہے، جبکہ قبرص کے معاملے پر پاکستان کی حمایت ہمارے لیے بہت اہمیت رکھتی ہے۔
آزاد فلسطینی ریاست کے لیے مشترکہ کوششیں
انہوں نے کہا کہ ترکیہ اور پاکستان ہر بین الاقوامی فورم پر مسئلہ فلسطین پر آواز بلند کرتے رہے ہیں، اور دونوں ممالک مل کر آزاد فلسطینی ریاست کے قیام کے لیے اپنی کوششیں جاری رکھیں گے۔
تجارت کے مواقع سے فائدہ اٹھانے کی ضرورت
پاک ترک بزنس فورم سے خطاب کرتے ہوئے ترک صدر نے کہا کہ پاکستان اور ترکیہ کو مختلف شعبوں میں تعاون بڑھانا چاہیے۔ اسلام آباد، تہران اور استنبول کے درمیان تجارت کے مواقع سے فائدہ اٹھانے کی ضرورت ہے، جبکہ اقتصادی راہداری منصوبہ تجارت کے فروغ کے لیے اہم ہے۔
انہوں نے مزید کہا کہ پاکستانی عوام نے ہمیشہ مشکل وقت میں ترکیہ کا ساتھ دیا ہے، اور یہ تعلقات مستقبل میں مزید مضبوط ہوں گے۔
