اسلام آباد(سٹاف رپورٹر)وزیراعظم محمد شہباز شریف نے پاکستان میں تعلیم کو عالمی معیار سے ہم آہنگ کرنے کے لیے جدید ٹیکنالوجی کے استعمال کو ناگزیر قرار دیتے ہوئے کہا ہے کہ نظام تعلیم میں جدت لانا اور نوجوانوں کو پیشہ وارانہ صلاحیتوں سے آراستہ کرنا حکومت کی اولین ترجیحات میں شامل ہے۔ ان خیالات کا اظہار انہوں نے سنٹانا ایجوکیشن (Cintana Education) کے بانی اور چیئرمین ڈگ بیکر کی قیادت میں ایریزونا سٹیٹ یونیورسٹی کے وفد سے گفتگو کرتے ہوئے کیا جس نے جمعرات کو یہاں ان سے ملاقات کی۔ وزیراعظم آفس کے میڈیا ونگ کی طرف سے جاری بیان کے مطابق وزیر اعظم نے کہا کہ پاکستان میں تعلیم کو عالمی معیار کے مطابق لانے کے لیے جدید ٹیکنالوجی کا استعمال ناگزیر ہے۔ انہوں نے کہا کہ نظام تعلیم میں جدت لانا اور ملک کے نوجوانوں کو پیشہ ورانہ صلاحیتوں سے آراستہ کرنا حکومت کی اولین ترجیحات میں شامل ہے، تعلیم کے شعبے میں تمام حکومتی پالیسیاں نوجوانوں کو پیشہ وارانہ صلاحیتوں کی بنیاد پر روزگار کے مواقع فراہم کرنے پر مرکوز ہیں۔
وزیراعظم نےایریزونا سٹیٹ یونیورسٹی کے تعاون سے نیشنل انسٹیٹیوٹ آف ٹیکنالوجی کی تعمیر کو انتہائی اہم سنگ میل قرار دیتے ہوئے کہا کہ ایریزونا سٹیٹ یونیورسٹی کے تعاون سے تعمیر شدہ نیشنل انسٹیٹیوٹ آف ٹیکنالوجی میں پاکستانی نوجوانوں کو عالمی سطح پر مسابقتی بنیاد پر کام کرنے کے لیے تربیت دی جائے گی۔ انہوں نے کہا کہ نیشنل ووکیشنل اینڈ ٹیکنیکل ٹریننگ کمیشن (نیوٹیک) میں گزشتہ ایک برس میں حکومت نے متعدد اصلاحات کی ہیں اور اسے مزید موثر اور کارآمد بنایا گیا ہے انہوں نے پیشہ ورانہ تربیت کے شعبے میں جدت لانے کے لیے نیوٹیک کو ایریزونا سٹیٹ یونیورسٹی کے ساتھ تعاون کی ہدایت کی ۔ ملاقات میں ایریزونا سٹیٹ یونیورسٹی کے تعاون سے پاکستان میں تعمیر شدہ نیشنل انسٹیٹیوٹ آف ٹیکنالوجی کی آپریشنلائزیشن کے حوالے سے گفتگو کی گئی۔ اس موقع پر سنٹانا ایجوکیشن کے بانی ڈگ بیکر نے بتایا کہ ایریزونا سٹیٹ یونیورسٹی پاکستان میں تعلیم کے شعبے میں جدت لانے کے لیے وسائل اور سہولیات فراہم کرے گی۔
ملاقات کے اختتام پر وزیراعظم نے رواں سال فعال ہونے والے نیشنل انسٹیٹیوٹ آف ٹیکنالوجی کی یادگاری تختی کی نقاب کشائی کی۔ وفاقی وزیر اقتصادی امور احد خان چیمہ، وفاقی وزیر تعلیم خالد مقبول صدیقی، وفاقی وزیر آئی ٹی شزا فاطمہ خواجہ اور متعلقہ اداروں کے اعلیٰ حکام بھی ملاقات میں موجود تھے
