وزیراعظم محمد شہباز شریف پنجاب کے سیلاب سے متاثرہ علاقوں کے دورے پر روانہ

اسلام آباد (سٹاف رپورٹر) وزیراعظم محمد شہباز شریف پنجاب کے سیلاب سے متاثرہ علاقوں کے دورے پر روانہ ہوگئے ۔ پی ایم آفس کے میڈیا ونگ سے جاری بیان کے مطابق روانگی سے قبل اور فضائی جائزے کے دوران چیئرمین این ڈی ایم اے لیفٹیننٹ جنرل انعام حیدر نے ملک میں مجموعی سیلابی صورتحال پر وزیراعظم کو تفصیلی بریفنگ دی،وزیراعظم کو پنجاب کے دریاؤں میں طغیانی اور زیر آب علاقوں میں ریسکیو و ریلیف آپریشن بارے تفصیلی بریف کیا گیا، وزیر اعلیٰ پنجاب مریم نواز شریف بھی لاہور سے وزیراعظم کے ہمراہ نارووال روانہ ہوئیں اور دوران پرواز ان سے سیلابی صورتحال بارے تبادلہ خیال کیا، چیئرمین این ڈی ایم اے نے صورت حال اور حکومت کی طرف سے کئے گئے اقدامات سے آگاہ کیا، بیان کے مطابق وزیراعظم محمد شہباز شریف نے سیلاب زدہ علاقوں کا فضائی جائزہ لیتے ہوئے سیلابی صورتحال سے بچاؤ اور ریلیف آپریشن میں تمام ضروری اقدامات کرنے کی ہدایات جاری کیں۔ وزیر اعظم اور وزیر اعلیٰ کو نارووال میں تفصیلی بریفنگ دی جائے گی۔