اسلام آباد (سٹاف رپورٹر )وزیراعظم محمد شہباز شریف نے کہا ہے کہ فلسطینی عوام کی آزادی، عزت اور خوشحالی پاکستان کی بنیادی ترجیح ہے،1967ء سے پہلے کی سرحدوں کے مطابق ایک مضبوط اور قابل عمل فلسطینی ریاست کا قیام جس کا دارالحکومت القدس الشریف ہو، پاکستان کی مشرق وسطیٰ پالیسی کی بنیاد رہا ہے اور رہے گا۔
شرم الشیخ میں غزہ امن سربراہ اجلاس میں شرکت کے بعد وطن واپسی سے پہلے سماجی رابطے کے پلیٹ فارم ’’ ایکس ‘‘پر ایک پوسٹ میں وزیراعظم نے کہا کہ وہ شرم الشیخ میں غزہ امن سربراہ اجلاس میں شرکت کے بعد وطن واپسی کے لیے ہوائی جہاز پر سوار ہو رہے ہیں اور ممکنہ طور پر اس بڑی پیش رفت کی نوعیت کے بارے میں اپنے کچھ تاثرات بتانا چاہتے ہیں کہ یہ کیسے ممکن ہوا اور پاکستان کا کیوں اس سے بہت گہرا تعلق رہا ہے ،وزیر اعظم نے کہا کہ پاکستان کی سب سے اہم ترجیح غزہ میں نسل کشی کی مہم کو فوری طور پر روکنا تھا، دیگر برادر ممالک کے ساتھ مل کر اس ترجیح کو تسلسل کے ساتھ بیان کیا گیا اور تقویت دی گئی۔ وزیراعظم نے کہا کہ صدر ٹرمپ کے لیے ہمارا شکریہ اس بات کی بنا پر ہے کہ وہ اسے روکیں گے اور اس وعدے کو پورا کریں گے۔
وزیر اعظم نے کہا کہ ہم امن کے لیے صدر ٹرمپ کے منفرد کردار کی تعریف کرتے رہیں گے، فلسطینی عوام کی آزادی، وقار اور خوشحالی پاکستان کے لیے بنیادی اہمیت کی حامل ہے۔ وزیر اعظم نے کہا کہ انشاء اللہ 1967ء سے پہلے کی سرحدوں کی بنیاد پر جس کا دارالحکومت القدس الشریف ہو، ایک مضبوط اور قابل عمل فلسطینی ریاست کا قیام پاکستان کی مشرق وسطیٰ کی پالیسی کی بنیاد ہے اور رہے گی۔
