اسلام آباد (سٹاف رپورٹر)وزیراعظم محمد شہباز شریف نے کہا ہے کہ وفاقی حکومت ملکی اور غیر ملکی سرمایہ کاروں کی یکساں حوصلہ افزائی کر رہی ہے، نئے کاروبار کرنے میں رکاوٹوں اور مسائل کو حل کرنا حکومت کی ترجیحات میں شامل ہے،برآمدات میں اضافہ اور نئی صنعتوں کے قیام سے معیشت کے مثبت اشاریے دیرپا معاشی ترقی میں تبدیل کیے جا سکتے ہیں،ملکی مصنوعات اور ملک میں کاروبار کو نہ صرف علاقائی بلکہ عالمی سطح پر پرکشش بنانا حکومت کی معاشی منزل ہے،وفاقی حکومت کے ادارے مجموعی معاشی ترقی کے لیے ماہرین اور کاروباری افراد کی سفارشات پر حکمت عملی میں مزید بہتری لائیں گے۔
جمعرات کو وزیراعظم آفس کے میڈیا ونگ سے جاری بیان کے مطابق انہوں نے ان خیالات کا اظہار معیشت و صنعت کے مختلف شعبوں کے نمائندہ صنعتی و کاروباری شخصیات سے گفتگو کرتے ہوئے کیا جنہوں نے وزیراعظم سے ملاقات کی ۔ملاقات میں معیشت و صنعت کے مختلف شعبہ جات کے نمائندگان نے اپنےمتعلقہ مسائل اور مختلف حکومتی اقدامات کے لیے سفارشات پیش کیں۔ملاقات میں ملکی معیشت میں بہتری اور سرمایہ کاری میں اضافے کے لئے کاروباری شخصیات کی طرف سے پیش کی گئی سفارشات کا جائزہ لیا گیا۔
ملاقات میں وفاقی وزیر خزانہ محمد اورنگزیب، وفاقی وزیر توانائی سردار اویس احمد خان لغاری، وفاقی وزیر اکنامک افیئرز ڈویژن احد خان چیمہ، وفاقی وزیر ریلوے حنیف عباسی، وفاقی وزیر اطلاعات و نشریات عطاء اللہ تارڑ، وفاقی وزیر تجارت جام کمال ،وفاقی وزیر قومی تحفظ خوراک رانا تنویر حسین، وفاقی وزیر انفارمیشن ٹیکنالوجی شزا فاطمہ خواجہ، وزیر مملکت برائے خزانہ بلال اظہر کیانی اور متعلقہ وزارتوں کے سرکاری افسران نے شرکت کی۔
وزیراعظم نے تمام نمائندگان کی سفارشات کے تناظر میں بہترین حکمت عملی ترتیب دینے کی ہدایات جاری کیں تاکہ ملکی معیشت کو کاروباری حضرات کے تعاون سے دیر پا ترقی اور مثبت سمت پر گامزن کیا جا سکے۔ اجلاس میں بالخصوص صنعتی پیداوار کے اخراجات کو کم کرنے، علاقائی سطح پر دوسرے ممالک کی مصنوعات کے مقابلے میں پرکشش بنانے اور پاکستان میں صنعت و تجارت میں بین الاقوامی سرمایہ کاری کے امکانات پر تفصیلی جائزہ لیا گیا۔کاروباری شخصیات نے مختلف شعبوں میں حکومتی اقدامات کے پیش نظر میکرو اکنامک استحکام کی تعریف کی اور کہا کہ اسی مثبت سمت میں مزید موثر کام کرنے سے ملک میں معاشی صورتحال سرمایہ کاری کے لیے مزید سازگار بنائی جا سکتی ہے۔
وزیراعظم نے کہا کہ ملکی برآمدات میں اضافہ اور نئی صنعتوں کے قیام سے معیشت کے مثبت اشاریے جلد از جلد دیرپا معاشی ترقی میں تبدیل کیے جا سکتے ہیں،وفاقی حکومت ملکی اور بیرونی سرمایہ کاروں کی یکساں حوصلہ افزائی کرتی ہے اور نئے کاروبار کرنے میں تمام ممکنہ رکاوٹوں اور مسائل کو حل کرنا حکومت کی ترجیحات میں شامل ہے۔ وزیر اعظم نے کہا کہ ملک میں صنعتی و معاشی ترقی کے لیے کاروباری حضرات کو ہر طرح کی سہولت پہنچانا حکومت کی اولین ترجیحات میں شامل ہے،ملکی معیشت کی دیر پا ترقی کے لیے سرکاری و نجی شعبوں کے باہمی اور عملی تعاون سے مثبت نتائج حاصل کیے جا سکتے ہیں۔
وزیر اعظم نے کہا کہ ملکی مصنوعات اور ملک میں کاروبار کو نہ صرف علاقائی بلکہ عالمی سطح پر پرکشش بنانا حکومت کی معاشی منزل ہے،ملکی مثبت معاشی اشاریوں کو قومی ترقی و خوشحالی کی شکل میں عوام تک بہم پہنچانے کے لیے وفاقی حکومت اور تمام متعلقہ ادارے دن رات محنت کر رہے ہیں۔ وزیر اعظم نے کہا کہ بین الاقوامی سطح پر تجارت کے ساتھ مصنوعات کی تیاری اور پیداواری شعبہ میں بیرونی سرمایہ کاری لانے کے لیے حکومت موثر اقدامات کر رہی ہے،معاشی ترقی کے لیے عالمی سطح کی کمپنیوں کی سرمایہ کاری کے علاوہ ملکی صنعتوں کے فروغ کے لیے بھرپورطریقے سے کام جاری ہے۔
