اسلام آباد (سٹاف رپورٹر)وزیر اعظم محمد شہباز شریف نے پولینڈ کے ساتھ تجارت، توانائی، دفاع، تعلیم اور باہمی دلچسپی کے دیگر شعبوں میں دوطرفہ تعاون کو مزید وسعت دینے کی خواہش کا اظہار کرتے ہوئے پولینڈ کی کمپنیوں کو پاکستان میں سرمایہ کاری کی دعوت دی ہے۔جمعرات کو وزیراعظم آفس کے میڈیا ونگ سے جاری بیان کے مطابق وزیراعظم سے پولینڈ کے نائب وزیر اعظم و وزیر خارجہ رادوسائو سیکورسکی نے وزیر اعظم ہائوس میں ملاقات کی۔ نائب وزیراعظم و وزیر خارجہ محمد اسحاق ڈار ، سیکرٹری خارجہ آمنہ بلوچ اور پولینڈ میں پاکستان کے سفیر سمیع ملک بھی ملاقات میں موجود تھے۔
ملاقات میں وزیراعظم نے کہا کہ پاکستان اور پولینڈ کے درمیان کئی دہائیوں پر محیط خوشگوار اور دوستانہ تعلقات ہیں۔ انہوں نے پولینڈ کی اعلیٰ سطح کی صنعت کاری اور ترقی کی تعریف کی جو کہ 1970ء کی دہائی سے پولینڈ کی ایک خصوصیت رہی ہے ۔ وزیراعظم نے تجارت، توانائی، دفاع، تعلیم، محنت اور باہمی دلچسپی کے دیگر شعبوں میں دوطرفہ تعاون کو مزید وسعت دینے کی پاکستان کی خواہش کا اظہار کیا۔ اس سلسلہ میں وزیراعظم نے پولینڈ کی کمپنیوں کو پاکستان میں سرمایہ کاری بالخصوص توانائی، کان کنی اور انفارمیشن ٹیکنالوجی کے شعبوں میں نئے مواقع تلاش کرنے کی دعوت دی۔ملاقات میں مشرق وسطیٰ اور یوکرین میں امن کی کوششوں سمیت علاقائی اور بین الاقوامی پیش رفت پر بھی تبادلہ خیال کیا گیا۔
وزیراعظم نے مذاکرات اور سفارت کاری کے ذریعہ تنازعات کے پرامن حل کی اہمیت پر زور دیا اور بین الاقوامی قانون، انسانی اصولوں اور اقوام متحدہ کے چارٹر کی پاسداری کے لیے پاکستان کے مستقل موقف کو اجاگر کیا۔وزیراعظم نے پولینڈ کے وزیراعظم ڈونلڈ ٹسک کے نام تہنیتی پیغام دیا اور انہیں جلد از جلد پاکستان کا سرکاری دورہ کرنے کی دعوت دی۔ پولینڈ کے نائب وزیر اعظم اور وزیر خارجہ نے مختلف شعبوں میں پاکستان کے ساتھ تعلقات کو مزید فروغ دینے کےلئے پولینڈ کی بھرپور دلچسپی کا اظہار کیا۔
انھوں نے بتایا کہ پاکستان کے پیٹرو کیمیکل سیکٹر میں پولینڈ کی سرمایہ کاری 0.5 ارب ڈالر سے زیادہ ہے اور تجویز پیش کی کہ پاکستان بھی واٹر ٹریٹمنٹ میں پولینڈ کی مہارت سے فائدہ اٹھا سکتا ہے۔ انہوں نے علاقائی امن و استحکام کے فروغ میں پاکستان کے کردار کو بھی سراہا۔ملاقات میں دونوں ممالک کے درمیان تعاون کو مزید مستحکم کرنے کے لیے رابطے بڑھانے پر اتفاق کیا گیا۔
قبل ازیں پولینڈ کےنائب وزیر اعظم و وزیر خارجہ نے دفتر خارجہ میں نائب وزیر اعظم و وزیر خارجہ محمد اسحاق ڈار کے ساتھ تفصیلی بات چیت کی، اس موقع پر دونوں ممالک کے درمیان مفاہمت کی دو یادداشتوں پر دستخط بھی کئے گئے اور مقامی تھنک ٹینک میں ایک سیمینار سے خطاب بھی کیا۔
