نئی دہلی(سی این پی) شرپسند بھارت میں جی 20 سربراہی اجلاس آج سے جاری جس کیلئے عالمی رہنماؤں کی آمد کا سلسلہ جاری ہے ، ایسے میں مودی نے اپنے کالے کرتوت چھپانے کیلئے جوبائیڈن کی ملاقات کے موقع پر میڈیا کو کوریج سے روک دیا ہے ۔
بھارتی وزیر اعظم نریندر مودی نے نئی دہلی میں جی20 سربراہی اجلاس کیلئے آئے امریکی صدر جو بائیڈن کا پرتپاک استقبال کیا تاہم میڈیا نمائندوں کو ملاقات کی کوریج سے روک دیا گیا، بھارتی حکومت کی جانب سے یہ فیصلہ جون میں نریندر مودی کے سرکاری دورہ امریکا کے بعد سامنے آیا ہے جہاں انہوں نے واشنگٹن میں امریکی نامہ نگاروں کی جانب سے ایک سوال لینے پر رضامندی ظاہر کی تھی۔ جس میں وال اسٹریٹ کی رپورٹر سبرینا صدیقی نے وزیر اعظم سے بھارت میں مسلمانوں پر جبر و تشدد اور انسانی حقوق کیخلاف وزریوں سے متعلق سوال کیا تھا اور اب ایسے ہی کسی سوال سے بچنے کیلئے مودی نے میڈیا کو کوریج سے ہی روک دیا ہے ۔
اس سے قبل وائٹ ہاؤس کی ترجمان کیرن جین پیئر نے امریکی صدر کو بھارت لے جانے والے طیارے میں سوار صحافیوں سے گفتگو میں کہا کہ آزاد صحافت امریکی جمہوریت کا ستون ہے اور وہ جوبائیڈن کی ملاقات تک میڈیا نمائندوں کی رسائی کو یقینی بنانے کے لیے ہر ممکن کوشش کر رہے ہیں،دوسری جانب امریکی قومی سلامتی کے مشیر جیک سلیوان نے ایئر فورس ون کے بورڈ پر کہا کہ ہم صحافیوں کی صدر کے معمولات تک رسائی حاصل کرنے اور اسے یقینی بنانے کے لیے سخت محنت کرتے ہیں۔ تاہم بھارت میں لینڈنگ کے بعد بائیڈن بھارتی رہنما کی رہائش گاہ کی طرف روانہ ہوئے لیکن ان کے ساتھ سفر کرنے والے صحافیوں کو باہر ہی رہنے کو کہا گیا۔
