پشاور( سٹاف رپورٹر )گورنرخیبرپختونخوا فیصل کریم کنڈی نے کہاہے کہ نوجوانوں کا مستقبل اعلیٰ تعلیم سےجڑا ہے،تعلیم یافتہ نوجوان ملک و قوم کا روشن مستقبل ہیں،ہمارے صوبہ کے نوجوان تعلیم و قابلیت میں کسی سے کم نہیں،عصر حاضر کے تقاضوں اور موجودہ دور کے چیلینجز کے مطابق اعلی تعلیم کی فراہمی یقینی بنانا ہو گی،گورنر ہاؤس پشاور نوجوانوں کو تعلیم و کھیل کے میدان میں آگے لانے کیلئے مکمل سرپرستی کر رہا ہے۔ان خیالات کا اظہارانہوں نے پشاور میں جمعرات کے روز سرحد یونیورسٹی آف سائنس اینڈ انفارمیشن ٹیکنالوجی کے 17ویں کانووکیشن سے بحیثیت مہمان خصوصی خطاب کرتے ہوئے کیا۔ تقریب میں گیسٹ آف آنر سابق نگران صوبائی وزیر ڈاکٹر قاسم جان، وائس چانسلر پروفیسر ڈاکٹر سلیم الرحمان، فیکلٹی اراکین سمیت طلباء و طالبات اور انکے والدین شریک تھے۔
گورنر نے کانووکیشن میں مختلف شعبوں میں بیچلرز،ایم ایس، ایم فل اور پی ایچ ڈی کی تعلیم مکمل کرنیوالے 225 طلباء وطالبات میں ڈگریاں تقسیم کیں اور 38 نمایاں پوزیشن ہولڈرز طلبہ کو گولڈ میڈلز سے نوازا۔کانووکیشن میں وائس چانسلر پروفیسر ڈاکٹر سلیم الرحمان نے گورنر خیبر پختونخوا کو یونیورسٹی کی مجموعی کارکردگی سے متعلق رپورٹ بھی پیش کی۔تقریب سے خطاب کرتے ہوئے گورنرنے تعلیمی کامیابی حاصل کرنیوالے طلبہ، والدین، فیکلٹی اراکین کو مبارکباد پیش کی۔گورنرنے سرحد یونیورسٹی انتظامیہ کو گزشتہ 24 سال سے تعلیمی خدمات پربھی مبارکباد پیش کی۔
