پشاور(سٹاف رپورٹر )وزیراعلی خیبر پختونخوا علی امین خان گنڈاپور نےافغانستان کے سفارتخانے کا دورہ کیا۔ وزیراعلی ہاؤس کی جانب سے جاری بیان کے مطابق وزیراعلی خیبر پختونخوا نے پاکستان میں تعینات افعان سفیر سردار آحمد شکیب سے ملاقات کی۔ وزیراعلی کے مشیر برائے اطلاعات بیرسٹر محمد علی سیف اور ایم این اے فیصل امین گنڈاپور بھی وزیراعلی خیبر پختونخوا کے ہمراہ تھے۔ وزیراعلی خیبر پختونخوا علی امین خان گنڈاپور نے افعان سفیر سے افغانستان میں زلزلے سے قیمتی انسانی جانوں کے ضیاع پر تعزیت اور دلی ہمدردی کا اظہار کرتے ہوئے زلزلے میں جاں بحق ہونے والوں کی مغفرت کے لئے فاتحہ خوانی اور دعا کی۔
وزیراعلی خیبر پختونخوا نے کہا کہ زلزلے سے قیمتی انسانی جانوں کے ضیاع پر دلی صدمہ ہوا، صوبائی حکومت اور صوبے کے عوام اپنے افعان بہن بھائیوں کے غم میں برابر کے شریک ہیں۔صوبائی حکومت اور صوبے کے عوام مشکل کی اس گھڑی میں متاثرین کے ساتھ ہیں، صوبائی حکومت متاثرین کی ہر ممکن مدد کے لئے تیار ہے۔
افعان سفیر نے زلزلہ متاثرین کےلئے دل کھول امداد دینے پرخیبر پختونخوا حکومت اور وزیراعلی خیبر پختونخوا کا شکریہ ادا کیا۔ افغان سفير نے کہا کہ اس خیر سگالی کےلئے افغان حکومت اور عوام تہہ دل سے مشکور ہیں۔ملاقات میں باہمی دلچسپی کے امور، علاقائی امن اور وطن واپس جانے والے افعان باشندوں کو درپیش مسائل پر بھی گفتگو ہوئی اور خطے میں پائیدار امن کےلئے مذاکرات اور تجارتی سرگرمیوں کو فروغ دینے کی ضرورت پر زور دیا گیا۔ وزیراعلی نے کہا کہ دہشت گردی کے خاتمے کےلئے لوگوں کو روزگار کے مواقع فراہم کرنا ضروری ہے.
دونوں ممالک کے درمیان تجارتی سرگرمیوں کو فروغ دے کر لوگوں کے لئے روزگار کے مواقع پیدا کئے جاسکتے ہیں، یہ دونوں ممالک کے وسیع تر مفاد میں ہے۔ انہوں نے کہا کہ خیبر پختونخوا حکومت وطن واپس جانے والے افعان مہاجرین کو ہر ممکن سہولیات فراہم کر رہی ہے، صوبائی حکومت وطن واپس جانے والے مہاجرین کو درپیش مسائل کے حل کےلئے اپنی سطح پر بھر پور کوششیں کر رہی ہے۔
