افریقا میں ائیرلائنز کے سب سے بڑے نیٹ ورک ایتھوپیئن ائیر لائنز کی پاکستان کے بڑے شہر کراچی کیلئے 19 سال بعد پہلی براہ راست پرواز نے آج صبح مقررہ وقت پر جناح انٹرنیشنل ائیرپورٹ پر لینڈ کیا۔
وزیراعلیٰ سندھ سید مراد علی شاہ اور وفد نے اولڈ ٹرمینل پر پرواز کو خوش آمدید کہا، صوبائی وزرا شرجیل میمن، ناصر شاہ، اکرام اللہ دھاریجو اور مرتضیٰ وہاب بھی وزیراعلیٰ کے ساتھ تھے۔
ادیس ابابا سے کراچی کیلئے پہلی پرواز میں ایتھوپیا کے اسٹیٹ منسٹر سمیت تین وزیر مملکت، ان کی وزارتوں کے اعلیٰ افسران، سفارتکاروں اور تجارتی وفد سمیت 110 مسافر کراچی پہنچے،مہمانوں اور پرواز کا روایتی اور والہانہ استقبال کیا گیا۔ ایتھوپیا نے کراچی کیلئے پہلی بار جولائی 1966میں براہ راست پروازوں کا آغاز کیا تھا جو دسمبر 1971 تک جاری رہا جس کے بعد دوبارہ جون 1993 سے جولائی 2004 تک یہ سروس جاری رہی۔
ایوی ایشن ذرائع کے مطابق اب تیسری بار یہ سلسلہ لگ بھگ دو دہائی بعد آج 9 مئی سے شروع ہوا ہے۔ ایتھوپیئن ائیر لائن نے لگ بھگ 4 گھنٹے 25 منٹ دورانیہ کی اس پرواز کیلئے برانڈ نیو بوئنگ 737 میکس 8 طیارہ استعمال کیا ہے۔
Sindh Chief Minister Syed Murad Ali received Ethopian state Ministers for Foreign Affairs Mr Mesganu Arga, Technology Fozia Amin and Commerce Kassahun Gofe at Old Terminal. pic.twitter.com/5W6xjbIUpr
— Sindh Chief Minister House (@SindhCMHouse) May 9, 2023
کراچی کیلئے پہلی براہ راست پرواز ای ٹی 694 ادیس ابابا سے اگرچہ 52 منٹ کی تاخیر سے روانہ ہوئی تاہم پرواز مقررہ وقت سے ایک منٹ قبل صبح 5 بجکر 4 منٹ پر کراچی کے جناح انٹرنیشنل ائیرپورٹ پراتری، یہی طیارہ پرواز ای ٹی 695 کے طور پر ادیس ابابا روانہ ہو رہا ہے۔ ایتھوپیئن ائیر لائن کی عدیس ابابا سے کراچی کیلئے ہفتے میں 4 پروازیں چلائی جائیں گی۔
پاکستان میں ایتھوپیئن سفیر جمال بیکر نے گزشتہ روز کراچی میں پریس کانفرنس کرتے ہوئے براہ راست پروازوں سے ایتھوپیا اور پاکستان کے درمیان تجارت اور سیاحت کا فروغ قرار دیا۔ انہوں نے شکریہ ادا کیا کہ حکومت پاکستان نے فضائی رابطوں کی بحالی کے لیے کلیدی کردار ادا کیا۔
