پشاور۔خیبر پختونخوا کابینہ نے آئی جی اسلام آباد سمیت 500 پولیس اہلکاروں کے خلاف مقدمہ درج کرنے کا فیصلہ کرلیا۔صوبائی کابینہ نے کے پی ہاؤس اسلام آباد پر حملہ آور ہونے، غیر قانونی طور پر چھاپہ مارنے اور احاطے میں گھسنے کے خلاف مقدمہ درج کرنے کی ہدایت کر دی۔
کابینہ کے فیصلے کے مطابق کے پی ہاوس سے چوری و دیگر جرائم کے مرتکب ہونے اور رہائشیوں کی پرائیویسی کی خلاف ورزی کرنے پر ایف آئی آر درج کی جائے، ایف آئی آر میں انسداد دہشت گردی ایکٹ کی متعلقہ دفعات بھی شامل کرنے کا فیصلہ کیا ہے۔صوبائی حکومت نے اسلام آباد کی متعلقہ عدالتوں میں ایسی شکایات درج کروائی تھیں لیکن اس بار مقدمہ خیبر پختونخوا میں درج کیا جائے گا۔
اس حوالے سے آئی جی اسلام آباد کے ترجمان سے رابطہ کیا گیا تو انہوں نے بتایا کہ میڈیا رپورٹس میں یہ خبریں آئی ہیں تاہم ہمارے پاس کوئی آفیشل سٹیٹمنٹ نہیں آئی،اگر ہمارے سامنے چیزیں آئیں گی تو ہم قانون کے مطابق اس کو دیکھیں گے ،انہوں نے کہا کہ خیبرپختونخواہ پولیس اہلکاروں کے خلاف کوئی غلط کام نہیں کیا ،ہم نے قانون کے مطابق کارروائی کی ہے ۔
