پشاور۔فنڈز نہ ملنے کی صورت میں خیبرپختونخوا اسمبلی کے سامنے احتجاج کرنے والے بلدیاتی ملازمین پر پولیس نے لاٹھی چارج اور آنسو گیس کی شیلنگ کی۔
چند دن قبل بلدیاتی ملازمین نے خیبرپختونخوا اسمبلی کے سامنے احتجاج کرتے ہوئے صوبائی حکومت سے بلدیاتی فنڈز جاری کرنے کا مطالبہ کیا تھا اور یکم جنوری کو اس سلسلے میں آخری تاریخ مقرر کی تھی۔
فنڈز کی فراہمی میں حکومتی عدم دلچسپی اور کسی حکومتی افسر کے ساتھ بات چیت نہ ہونے کی وجہ سے بلدیاتی ملازمین نے اپنی مقررہ تاریخ پر عمل کرتے ہوئے آج یکم جنوری کو صوبائی اسمبلی کے سامنے احتجاج کا آغاز کیا اور خیبر روڈ کو بلاک کر دیا۔
ملازمین اپنے مطالبات کے حق میں بینرز لے کر آئے اور حکومت کے خلاف نعرے بازی بھی کی۔
پولیس نے مظاہرین کو ہٹانے کی کوشش کی، لیکن وہ نہ ہٹنے پر ان پر لاٹھی چارج اور آنسو گیس کی شیلنگ کی۔ مظاہرین تھوڑی دیر کے لیے منتشر ہوئے، پھر انہوں نے احتجاج جاری رکھتے ہوئے جی ٹی روڈ کو بند کر دیا۔
